മഞ്ചേശ്വരം: ഉപജില്ലാ കായികമേളക്കു കൂട്ടിക്കൊണ്ടു പോയ ഒന്നാം ക്ലാസുകാരനെ കായികമേള നടന്ന സ്‌കൂളില്‍ മറന്ന് അധ്യാപിക മറ്റു കുട്ടികള്‍ക്കൊപ്പം മടങ്ങി. ഒറ്റപ്പെട്ടു കിലോമീറ്ററുകള്‍ നടന്നു തളര്‍ന്ന കുട്ടിയെ കണ്ട നാട്ടുകാര്‍ രക്ഷിതാക്കളെ വിളിച്ചു കുട്ടിയെ ഏല്‍പ്പിച്ചു. ഇന്നലെ രാത്രി ഏഴോടെ ഉപ്പള ടൗണിലാണു സംഭവം. കയ്യാറിലെ ഒരു സ്‌കൂളിലെ കുട്ടിയെയാണ് അധ്യാപിക മറന്നത്. രാവിലെ 19 കുട്ടികളുമായാണ് അധ്യാപിക കായികമേളക്കു പോയത്. വൈകിട്ട് മടങ്ങുകയും ചെയ്തു. എന്നാല്‍ ഒരു കുട്ടിയെ സ്‌കൂളില്‍ മറക്കുകയായിരുന്നു.
പെര്‍മുദെ പുട്ടമനെയിലെ ആറു വയസ്സുകാരനാണ് ഒറ്റപ്പെട്ടുപോയത്. കായികമേള നടക്കുന്ന മഞ്ചേശ്വരത്തെ സ്‌കൂളില്‍ നിന്നു 15 കിലോമീറ്റര്‍ ദൂരമുണ്ട് കയ്യാറിലെ സ്‌കൂളിലേക്ക്. രാത്രി ഏഴോടെ കുട്ടി ഉപ്പള ടൗണിലൂടെ സ്‌കൂള്‍ ബാഗുമായി യൂനിഫോമില്‍ പോകുന്നത് മംഗല്‍പാടി പഞ്ചായത്ത് സ്റ്റാന്റിങ് കമ്മിറ്റി ചെയര്‍മാന്‍ ബി മുസ്തഫയും സുഹൃത്തുക്കളായ സാഹിര്‍, സുഹൈല്‍ എന്നിവരുമാണ് കണ്ടത്. കുട്ടിയോട് വിവരങ്ങള്‍ തിരക്കിയപ്പോള്‍ കായികമേളക്കു പോയതാണെന്നും തന്നെ കൂട്ടാതെ ബസ് പോയെന്നും പറഞ്ഞു.
ഒടുവില്‍ കുട്ടിയില്‍ നിന്നു ലഭിച്ച വിവരത്തിന്റെ അടിസ്ഥാനത്തില്‍ മാതാപിതാക്കളെ കണ്ടെത്തി കുട്ടിയെ ഏല്‍പ്പിക്കുകയായിരുന്നു.