കൊടുങ്ങല്ലൂര്‍: കൊടുങ്ങല്ലൂരില്‍ വന്‍ കഞ്ചാവ് വേട്ട. ഒരു സ്ത്രീ അടക്കം രണ്ട് പേര്‍ കസ്റ്റഡിയില്‍. രണ്ട് സംഭവങ്ങളിലായി ഒന്നര കിലോ കഞ്ചാവും, ബൈക്കും എക്‌സൈസ് സംഘത്തിന്റെ കസ്റ്റഡിയില്‍. ചെന്ത്രപ്പിന്നി പെരുമ്പടപ്പ് എ.എല്‍.പി സ്‌കൂളിന് പരിസരത്ത് നിന്നും എടത്തിരുത്തി സ്വദേശി ഗിജു(40) നെയാണ് കൊടുങ്ങല്ലൂര്‍ റേഞ്ച് എക്‌സൈസ് ഇന്‍സ്‌പെക്ടര്‍ വി.പി സുധാകരന്റെ നേതൃത്വത്തിലുള്ള എക്‌സൈസ് സംഘം പിടികൂടിയത്. ഇയാളുടെ ബൈക്കിലും, ദേഹത്തും ഒളിപ്പിച്ച നിലയിലായിരുന്ന ഒന്നേകാല്‍ കിലോ കഞ്ചാവ് പിടികൂടി.
മൊബൈല്‍ ഫോണിലേക്ക് വരുന്ന വിളികള്‍ അനുസരിച്ചാണ് ഇയാള്‍ കഞ്ചാവ് ആവശ്യക്കാര്‍ക്ക് നല്‍കിയിരുന്നത്. ഇയാള്‍ പിടിയിലായ വിവരം അറിയാതെ നിരവധി പേരാണ് കഞ്ചാവിന് വേണ്ടി ഇയാളുടെ ഫോണിലേക്ക് വിളിച്ചുകൊണ്ടിരുന്നത്. ഇവരില്‍ പ്ലസ്ടു വിദ്യാര്‍ഥികളെയും, ഇരുപത് വയസ് കഴിഞ്ഞ ചിലരെയും എക്‌സൈസ് സംഘം തന്ത്രപൂര്‍വ്വം വിളിച്ചുവരുത്തി താക്കീത് നല്‍കി രക്ഷിതാക്കളോടൊപ്പം വിട്ടയച്ചു. എറിയാട് നിന്നുമാണ് വട്ടപ്പറമ്പില്‍ ആമി(52) ഇരുനൂറ് ഗ്രാം കഞ്ചാവുമായി പിടിയിലായത്.
കഞ്ചാവ് വില്‍പ്പനക്കാരനായ ബന്ധു മനാഫിനെ കഞ്ചാവുമായി ബന്ധപ്പെട്ട് പറവൂര്‍ പൊലിസ് എറിയാട് നിന്നും ബുധനാഴ്ച പിടികൂടിയിരുന്നു. ഈ വിവരം അറിഞ്ഞ് മനാഫ് വീട്ടില്‍ ഒളിപ്പിച്ച് വെച്ചിരുന്ന കഞ്ചാവ് എടുത്ത് കൊണ്ടുപോയി കളയുവാന്‍ ശ്രമിക്കുന്നതിനിടയിലാണ് ആമി പിടിയിലായത്. കഞ്ചാവ് വില്‍പ്പനയില്‍ സംശയം തോന്നാതിരിക്കാന്‍ ഭാര്യയെയും ബൈക്കിന് പിന്നിലിരുത്തിയാണ് ഇയാള്‍ കഞ്ചാവ് വില്‍പ്പന നടത്തി വന്നിരുന്നതെന്ന് എക്‌സൈസ് സംഘം പറയുന്നു. പ്രിവന്റീവ് ഓഫീസര്‍മാരായ എം.കെ. കൃഷ്ണന്‍, പി.ബി. ദക്ഷിണാമൂര്‍ത്തി, സിവില്‍ എക്‌സൈസ് ഓഫീസര്‍മാരായ കെ.എസ്. മന്മഥന്‍, വി.ബി. അബ്ദുള്‍ജബ്ബാര്‍, വി.വി. ബിന്ദുരാജ്, കെ.എം. അനില്‍കുമാര്‍, പി.കെ. സുനില്‍, ഒ.ടി. വില്‍സണ്‍, പി.പി. ഷാജി, പി.വി. ജോഷി, ചിഞ്ചു പോള്‍ എന്നിവര്‍ എക്‌സൈസ് സംഘത്തിലുണ്ടായിരുന്നു.