മാവൂര്‍: ചാലിയാര്‍ ജലകില്‍ നടക്കുന്ന കെ.എ.ടി.എഫ് സംസ്ഥാന എക്‌സിക്യുട്ടീവ് ക്യാംപ് 20ന് വൈകീട്ട് മൂന്നിന് മുസ്‌ലിംലീഗ് ദേശീയസെക്രട്ടറി ഇ.ടി മുഹമ്മദ് ബഷീര്‍ എം.പി ഉദ്ഘാടനം ചെയ്യും. കെ.എ ഖാദര്‍മാസ്റ്റര്‍ അധ്യക്ഷനാകും. വര്‍ക്കിങ് ചെയര്‍മാന്‍ എ. മുഹമ്മദ് ആമുഖപ്രസംഗം നടത്തും.  കെ.എ.ടി.എഫ് മുഖ പത്രമായ അല്‍ ഇത്തിഹാദ് സ്‌പെഷല്‍ പതിപ്പ് മാവൂര്‍ ഗ്രാമപഞ്ചായത്ത് പ്രസിഡന്റ് സി. മുനീറത്ത് പ്രകാശനം ചെയ്യും.

അഞ്ചിന് നടക്കുന്ന സംഘടനാ പാര്‍ലമെന്റിന് എം.വി അലിക്കുട്ടി നേതൃത്വം നല്‍കും. 'അധ്യാപകന്‍: ഇടപെടലിന്റെ രീതിശാസ്ത്രം' എന്നവിഷയത്തില്‍ റഷീദ് കോടിയൂറ ക്ലാസെടുക്കും. ഒന്‍പതിന് നടക്കുന്ന ചോദനം സെഷന് മുഹമ്മദ് റഷീദ് നേതൃത്വം നല്‍കും. 9.30ന് പ്രവര്‍ത്തന രൂപരേഖയുടെ ഗ്രൂപ്പ്തല ചര്‍ച്ച നടക്കും.

21ന് രാവിലെ ആറിന് നടക്കുന്ന പ്രഭാത ചിന്തയില്‍ റഹ്മത്തുള്ള ഖാസിമി മൂത്തേടം ക്ലാസെടുക്കും. ഏഴിന് ചാലിയാറിലൂടെയുള്ള പഠന വിനോദയാത്രയ്ക്ക് ഉമ്മര്‍ ചെറൂപ്പ, കെ.എം.എ റഹ്മാന്‍ നേതൃത്വം നല്‍കും. സമര്‍പ്പണം സെഷനില്‍ ടി.പി ചെറൂപ്പ ക്ലാസെടുക്കും. സമാപന സെഷന്‍ എം.കെ രാഘവന്‍ എം.പി ഉദ്ഘാടനം ചെയ്യും.