കൊളത്തൂര്‍: ഇന്നലെയുണ്ടായ ശക്തമായ കാറ്റിലും മഴയിലും റോഡരികിലെ മരം പൊട്ടിവീണു. കൊളത്തൂര്‍ മലപ്പുറം റോഡില്‍ പലകപ്പറമ്പില്‍ അപകട ഭീഷണിയുയര്‍ത്തി റോഡിലേക്ക് ചാഞ്ഞു കിടന്നിരുന്ന മരമാണ് വൈദ്യുതി പോസ്റ്റ് തകര്‍ത്ത് പൊട്ടി വീണത്. കൊളത്തൂര്‍ കെ.എസ്.ഇ.ബി ഓഫീസില്‍ അറിയിച്ചതിനെ തുടര്‍ന്ന് വൈദ്യുതി ബന്ധം വിഛേദിച്ചു.
രാവിലെ ഏഴോടെ ഉണ്ടായ ശക്തമായ കാറ്റും മഴയും ഒരു മണിക്കൂറോളം നീണ്ടു നിന്നു. സമീപത്തെ വീടുകളുടെ തുറന്നിട്ട ജനവാതിലുകളുടെ ചില്ലുകള്‍ വരെ തകര്‍ന്നു വീണു. തുടര്‍ന്ന് 11 നാണ് വൈദ്യുതിബന്ധം പുനസ്ഥാപിച്ചത്. എരുമത്തടം മുതല്‍ പടപ്പറമ്പ് വരെയുള്ള റോഡിന്റെ ഇരു വശങ്ങളിലും നിരവധി മരങ്ങളാണ് അപകട ഭീഷണിയായുള്ളത്.