മെക്‌സിക്കോ സിറ്റി: മെക്‌സിക്കോയിലെ ഒരു കൊമേഴ്ഷ്യല്‍ വിമാനത്തില്‍ പാമ്പിനെ കണ്ടത് പരിഭ്രാന്തിക്കിടയാക്കി. മെക്‌സികന്‍ പട്ടണമായ ടോറിയോയില്‍ നിന്നും പറന്നുയരാന്‍ തുടങ്ങുന്നതിന് തൊട്ടുമുമ്പാണ് 2006 ലെ ഹോളിവുഡ് ചിത്രം 'സ്‌നേക് ഓണ്‍ എ പ്ലെയ്‌നി'ന് സമാനമായ സാഹചര്യമുണ്ടായത്.

യാത്രക്കാരെ ഞെട്ടിച്ച് വിമാനത്തിന്റെ ക്യാബിന് മുകളിലെ ലഗേജുകള്‍ക്കിടയില്‍ നിന്ന് പച്ച നിറത്തിലുള്ള ഒരു പാമ്പ് പുറത്തേക്ക് ഇറങ്ങി.

പരിഭ്രാന്തിക്കിടയില്‍ നിലത്തേക്ക് വീണ പാമ്പിനെ യാത്രക്കാര്‍ വിമാന ജീവനക്കാര്‍ നല്‍കിയ ബ്ലാങ്കെറ്റില്‍ പൊതിഞ്ഞു.യാത്രക്കാരുടെ സമയോചിതമായ ഇടപെടലാണ് ആര്‍ക്കും പാമ്പിന്റെ കടിയേല്‍ക്കാതെ രക്ഷപ്പെടുത്തിയത്.

ഒടുവില്‍ 10 മിനിട്ടിനുള്ളില്‍ വിമാനം അടിയന്തരമായി തിരിച്ചിറക്കി. യാത്രക്കാരെ സുരക്ഷിതരാക്കി ഇറക്കിയ ശേഷം മൃഗസംരക്ഷണ വകുപ്പ് ജീവനക്കാരെത്തി പാമ്പിനെ പിടികൂടി.

എങ്ങനെയാണ് ലഗേജ് ബാഗുകള്‍ക്ക് ഇടയില്‍ പാമ്പെത്തിയതെന്ന് കണ്ടെത്താനായിട്ടില്ല. സംഭവത്തെ കുറിച്ചറിയാന്‍ അന്വേഷണത്തിന് ഉത്തരവിട്ടിട്ടുണ്ടെന്ന് വിമാനഅധികൃതര്‍ അറിയിച്ചു.