ആലപ്പുഴ: ചക്കുളത്തുകാവ് ക്ഷേത്രത്തിലെ പ്രസിദ്ധമായ പൊങ്കാല മഹോത്സവത്തിന് ഡിസംബര്‍ 12ന് തുടക്കമാവും. പൊങ്കാലയുടെ സുതാര്യമായ നടത്തപ്പിന് തുടക്കമിട്ടതായി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. അഞ്ചുലക്ഷം വിശ്വാസികള്‍ പൊങ്കാലയിടും. ക്ഷേത്രത്തിന്റെ പരിസരപ്രദേശങ്ങള്‍ കൂടാതെ 70 കിലോമീറ്റര്‍ ചുറ്റളവില്‍ പൊങ്കാല അടുപ്പുകള്‍ നിരക്കും. ആലപ്പുഴ, പത്തനംതിട്ട ജില്ലകളുടെ അതിര്‍ത്തി പ്രദേശമായതിനാല്‍ രണ്ടു ജില്ലകളിലായി വിശ്വാസികള്‍ അടുപ്പുകള്‍ കൂട്ടും. തമിഴ്‌നാട്, കര്‍ണാടക, ആന്ധ്രാ എന്നീ സംസ്ഥാനങ്ങളില്‍നിന്നും വിദേശരാജ്യങ്ങളില്‍നിന്നും ഭക്തര്‍ എത്തിച്ചേരും. രാവിലെ 9ന് പൊങ്കാലയ്ക്ക് തുടക്കംകുറിച്ച് മുഖ്യകാര്യദര്‍ശി രാധാകൃഷ്ണന്‍ തിരുമേനി അഗ്നി പകരും.
മന്ത്രി മാത്യു ടി തോമസ് പൊങ്കാല ഉദ്ഘാടനം ചെയ്യും. ബി.ജെ.പി സംസ്ഥാന പ്രസിഡന്റ് കുമ്മനം രാജശേഖരന്‍ ഭദ്രദീപം തെളിക്കും. വാര്‍ത്താസമ്മേളനത്തില്‍ അഡ്വ. ഗോപാലകൃഷ്ണന്‍, ഉത്തമന്‍, സന്തോഷ് തുടങ്ങിയവര്‍ പങ്കെടുത്തു.