മൂവാറ്റുപുഴ: കുട്ടികളുടെ കരവിരുത് ഉത്സവത്തിന് മൂവാറ്റുപുഴയില്‍ തുടക്കമായി. മൂവാറ്റുപുഴ സെന്റ് അഗസ്റ്റിന്‍സ് സ്‌കൂളില്‍ ഡി.ഇ.ഒ ടി.വി രമണി പതാക ഉയര്‍ത്തിയതോടെ രണ്ട് ദിവസം നീണ്ട് നില്‍ക്കുന്ന റവന്യൂജില്ലാ സ്‌കൂള്‍ ശാസ്‌ത്രോത്സവം 2016ന് തുടക്കമായി. ശാസ്ത്രമേളയുടെ ഉദ്ഘാടനം ജില്ലാ പഞ്ചായത്ത് പ്രസിഡന്റ് ആശ സനില്‍ നിര്‍വഹിച്ചു.
മുനിസിപ്പല്‍ വൈസ് ചെയര്‍മാന്‍ പി.കെ ബാബുരാജ് അധ്യക്ഷത വഹിച്ചു. ജില്ലാ പഞ്ചായത്ത് അംഗം എന്‍ അരുണ്‍ മുഖ്യപ്രഭാഷണം നടത്തി. വിദ്യാഭ്യാസ സ്റ്റാ. കമ്മിറ്റി ചെയര്‍പേഴ്‌സണ്‍ പ്രമീള ഗിരീഷ് കുമാര്‍, കൗണ്‍സിലര്‍മാരായ കെ.എ അബ്ദുള്‍സലാം, സിന്ധു ഷൈജു, സെലിന്‍ ജോര്‍ജ്, സി.എം ഷുക്കൂര്‍, ആര്‍.ഡി.ഡി. കെ ഗോകുല്‍കൃഷ്ണന്‍, എ.ഡി ലിജി ജോസഫ്, സ്‌കൂള്‍ മാനേജര്‍ സിസ്റ്റര്‍ ഗ്ലോറി, പി.ടി.എ പ്രസിഡന്റ് ജോജോ വി.വി, പ്രിന്‍സിപ്പല്‍ സിസ്റ്റര്‍ റാണി ജോസ്, അധ്യാപക സംഘടനാ പ്രതിനിധി ടി.വി പീറ്റര്‍, കണ്‍വീനര്‍ എസ് സന്തോഷ് കുമാര്‍, പി.എ കബീര്‍ എന്നിവര്‍ പ്രസംഗിച്ചു.
ശാസ്‌ത്രോത്സവത്തിന്റെ ഭാഗമായുള്ള ശാസ്ത്രമേള, മൂവാറ്റുപുഴ നിര്‍മ്മല ഇ.എം.എച്ച്.എസ്.എസിലും ഗണിതശാസ്ത്രമേള എസ്.എന്‍.ഡി.പി സ്‌കൂളിലും, സാമൂഹ്യശാസ്ത്രമേള, ഐ.ടി മേള എന്നിവ സെന്റ് അഗസ്റ്റ്യന്‍സ് എച്ച്.എസ്.എസിലും, പ്രവര്‍ത്തി പരിചയമേള തര്‍ബിയത്ത് സ്‌കൂളിലും, മേഖലാ വൊക്കേഷണല്‍ എക്‌സ്‌പോ ഗവ. മോഡല്‍ സ്‌കൂളിലുമാണ് നടക്കുന്നത്. ജില്ലയിലെ 900 സ്‌കൂളുകളില്‍ നിന്നായി ആറായിരത്തോളം കുട്ടികളാണ് ശാസ്‌തോത്സവത്തിന്റെ ഭാഗമായുള്ള വിവിധ മത്സരങ്ങളില്‍ പങ്കെടുക്കുന്നത്. ഇന്ന് വൈകിട്ട് നടക്കുന്ന സമാപന സമ്മേളനം ജോയ്‌സ് ജോര്‍ജ് എം.പി.ഉദ്ഘാടനം ചെയ്യും. എല്‍ദോ എബ്രഹാം എം.എല്‍.എ സമ്മാനദാനം നിര്‍വ്വഹിക്കും. നഗരസഭാ ചെയര്‍പേഴ്‌സണ്‍ ഉഷ ശശീധരന്‍ അധ്യക്ഷത വഹിക്കും.