കോഴിക്കോട്: ഷാര്‍ജയില്‍ റീചാര്‍ജ് കൂപ്പണ്‍ തട്ടിപ്പിനിരയായ മലയാളികള്‍ക്കു കോടികള്‍ നഷ്ടമായെന്ന് ആരോപണം. തട്ടിപ്പു നടത്തി മുങ്ങിയ താമരശേരി വള്ളിക്കെട്ടുമ്മല്‍ ഷാനവാസിനെ കണ്ടെത്തണമെന്നു തട്ടിപ്പിനിരയായവര്‍ വാര്‍ത്താസമ്മേളനത്തില്‍ ആവശ്യപ്പെട്ടു.
മൊബൈല്‍ ഫോണ്‍ കൂപ്പണ്‍ മൊത്തമായും ചില്ലറയായും വാങ്ങുന്ന മലയാളികളില്‍ നിന്നു ചെക്കും പണവും വാങ്ങി കമ്പനിയിലടക്കാതെ താമരശേരി സ്വദേശി ഷാനവാസാണ് തട്ടിപ്പു നടത്തിയത്. ദുബൈ കമ്പിനിയായ വണ്‍ പ്രീ പേ മൊബൈല്‍ ജീവനക്കാരനാണ് ഷാനവാസ്. ശ്രീകണ്ഠപുരത്തെ ഷൈന്‍ മാത്യുവിനു 2.72 കോടി, വല്ല്യപ്പള്ളിയിലെ സജീറിനു 1.61 കോടി, ചൊക്ലിയിലെ അസ്‌ലമിനു 60 ലക്ഷം, കല്ല്യാശേരിയിലെ അനസിനു 1.20 കോടി മംഗളൂരുവിലെ അനസിനു 90 ലക്ഷം എന്നിങ്ങനെയാണു നഷ്ടമായത്. ഷാനവാസ് ഉള്‍പ്പെടെ അഞ്ചുപേര്‍ ചേര്‍ന്നു ഗൂഢാലോചന നടത്തിയാണു തട്ടിപ്പു നടത്തിയത്. കഴിഞ്ഞ മാര്‍ച്ച് 19നാണ് ദുബൈയില്‍ നിന്നു ഷാനവാസ് മുങ്ങിയതെന്നും പരാതിയുടെ അടിസ്ഥാനത്തില്‍ പൊലിസ് കേസെടുത്ത് അന്വേഷണം തുടങ്ങിയിട്ടുണ്ടെന്നും തട്ടിപ്പിനിരയായവര്‍ പറഞ്ഞു. വാര്‍ത്താസമ്മേളനത്തില്‍ ഷൈന്‍ മാത്യു, സജീര്‍ വല്ല്യപ്പള്ളി, അസ്‌ലം ചൊക്ലി, അനസ്, അഷ്‌റഫ് സംബന്ധിച്ചു.