കൊല്ലം: സിറ്റി പൊലിസ് സബ് ഡിവിഷന്റെ ആഭിമുഖ്യത്തില്‍ ടി. എം വര്‍ഗീസ് ഹാളില്‍ വിവിധ വകുപ്പുകളെ പങ്കെടുപ്പിച്ച് പരാതി പരിഹാര മെഗാഅദാലത്ത് നടത്തി. കാലങ്ങളായി പൊലിസ് സ്റ്റേഷനുകളില്‍ തീര്‍പ്പാക്കാനാകാതിരുന്നതും പുതുതായി ലഭിച്ചതുമായ 130 ഓളം പരാതികള്‍ പരിഹരിച്ചു. സബ് ഡിവിഷനിലെ സി.ഐമാര്‍, എസ്.എച്ച്ഓമാര്‍ മറ്റ് പൊലിസ് ഉദ്യോഗസ്ഥര്‍, റവന്യു, കോര്‍പറേഷന്‍, കെ.എസ്.ഇ.ബി, ഹെല്‍ത്ത്, പട്ടികജാതി പട്ടികവര്‍ഗ വകുപ്പ് തുടങ്ങി വിവിധ ഡിപ്പാര്‍ട്ട്‌മെന്റുകളുടെ പ്രതിനിധികളും പങ്കെടുത്തു. സൗജന്യ ആയൂര്‍വേദ, ഹോമിയോ മെഡിക്കല്‍ ക്യാംപും സംഘടിപ്പിച്ചു. രാവിലെ 10ന് ആരംഭിച്ച മെഗാ അദാലത്ത് സിറ്റി പൊലിസ് കമ്മിഷണര്‍ ഡോ. സതീഷ് ബിനോ ഉദ്ഘാടനം ചെയ്തു. പരാതികളും സ്വീകരിച്ചു.