ബാഗ്ദാദ്: വടക്കുകിഴക്കന്‍ ബാഗ്ദാദില്‍ ഉണ്ടായ മൂന്നു ബോംബാക്രമണത്തില്‍ 70 മരണം. 100ഓളം പേര്‍ക്ക് പരുക്കേറ്റതായും റിപ്പോര്‍ട്ട്. ഷിയ ഭൂരിപക്ഷമുള്ള മേഖലയിലാണ് സ്‌ഫോടനമുണ്ടായത്. അല്‍ഷാബ് മേഖലയിലെ മാര്‍ക്കറ്റിലായിരുന്നു ആദ്യ സ്‌ഫോടനം. 38 പേരാണ് അവിടെ മരണപ്പെട്ടത്. പിന്നീട് അല്‍പ്പസമയത്തിനു ശേഷം സദര്‍ മേഖലയില്‍ ചാവേര്‍ ബോംബാക്രമണമുണ്ടായി. മൂന്നാമതായി അല്‍ റഷീദ് പ്രദേശത്ത് കാര്‍ബോംബ് സ്‌ഫോടനത്തില്‍ 8 പേര്‍ മരിക്കുകയും 21 പേര്‍ക്ക് പരുക്കേല്‍ക്കുകയും ചെയ്തു. സ്‌ഫോടനങ്ങളുടെ ഉത്തരവാദിത്വം ഐ.എസ് ഏറ്റെടുത്തതായി ഓണ്‍ലൈനിലൂടെ അറിയിച്ചു.

കഴിഞ്ഞയാഴ്ച ബാഗ്ദാദിലും പരിസരത്തുമുണ്ടായ ബോംബ് സ്‌ഫോടനങ്ങളില്‍ 200 പേര്‍ക്കു ജീവന്‍ നഷ്ടപ്പെട്ടിരുന്നു. ഈ ആക്രമണങ്ങളുടെ ഉത്തരവാദിത്വവും ഐഎസ് ഏറ്റെടുത്തിരുന്നു.