ചങ്ങരംകുളം: ചൂണ്ടല്‍-കുറ്റിപ്പുറം സംസ്ഥാന പാതയിലെ സ്ഥിരം അപകട മേഖലയായ പാവിട്ടപ്പുറത്ത് വീണ്ടും അപകടം. ഗുരുവായൂരില്‍ നിന്നും ചങ്ങരംകുളം മാന്തടത്തേക്ക് പോകുകയായിരുന്ന ഓട്ടോയാണ് മറിഞ്ഞത്. ഇന്നലെ രാത്രി എട്ടിനാണ് സംഭവം. പാവിട്ടപ്പുറത്തെ അപകടങ്ങള്‍ക്ക് എന്നും കാരണമാകാറുള്ള ഇറക്കത്തോട് കൂടിയ വളവു കഴിഞ്ഞതും ഓട്ടോ റോഡ് സൈഡിലെ ഗര്‍ത്തത്തില്‍ ചാടുകയായിരുന്നു. തുടര്‍ന്ന് നിയന്ത്രണം വിട്ട ഓട്ടോ റോഡരികില്‍ പാര്‍ക്ക് ചെയ്തിരുന്ന ബൈക്കിലിടിച്ച് തല കീഴായ് മറിഞ്ഞു. അപകടത്തില്‍ ചങ്ങരംകുളം മാന്തടം സ്വദേശി ബാബുവിനും, ബാബുവിന്റെ മാതാവിനും, ഭാര്യക്കും, രണ്ടുവയസായ കുട്ടിക്കും പരുക്കേറ്റു.
നാട്ടുകാര്‍ ചേര്‍ന്ന് ചങ്ങരംകുളത്തെ സ്വകാര്യ ആശുപത്രിയില്‍ എത്തിച്ചെങ്കിലും പരുക്ക് ചെറിയ തോതില്‍ ഗുരുതരമായതിനാല്‍ എടപ്പാള്‍ ആശുപത്രിയിലേക്ക് മാറ്റി. പാവിട്ടപ്പുറത്തെ റോഡരികിലെ ഗര്‍ത്തത്തില്‍ വീണ് മുന്‍പും നിരവധി വാഹനപകടങ്ങള്‍ നടന്നിട്ടുണ്ട്. റോഡും നിലവും തമ്മിലുള്ള ഉയരം കൂടുതല്‍ കാരണമാണ് ഇവിടെ അപകടം സംഭവിക്കുന്നത്. ഗര്‍ത്തം കാരണം റൂട്ട് ബസുകളും റോഡിനരികില്‍ നിര്‍ത്താതെ റോഡിലാണ് നിര്‍ത്തുന്നത്. ഇത് ഗതാഗതക്കുരുക്കിനും കാരണമാകാറുണ്ട്.