വടകര: പരാതി അന്വേഷിക്കാന്‍ പോയ ചോമ്പാല എസ്.ഐ എന്‍. പ്രജീഷിനു നേരെ അക്രമം. സംഭവവുമായി ബന്ധപ്പെട്ട് ചോമ്പാല ഫിഷര്‍മാന്‍ കോളനി അന്‍സില മന്‍സില്‍ ഷാഹിദിനെ പൊലിസ് അറസ്റ്റ് ചെയ്തു.
ഇന്നലെ വൈകിട്ട് അഞ്ചോടെയാണ് സംഭവം. പ്രതിയുടെ സഹോദരന്‍ മന്‍സൂര്‍ ചോമ്പാല പൊലിസിനു നല്‍കിയ പരാതി അന്വേഷിക്കാന്‍ വീട്ടിലെത്തിയതായിരുന്നു എസ്.ഐയും സംഘവും. മന്‍സൂറിന്റെ 25000 രൂപയും അഞ്ചു പവന്‍ സ്വര്‍ണവും കളവു പോയെന്ന പരാതി അന്വേഷിക്കാനാണ് എസ്.ഐയും സംഘവും എത്തിയത്.
ഈ സമയത്ത് വീട്ടിലുണ്ടായിരുന്ന ഷാഹിദ് പൊലിസുകാരെ തട്ടിമാറ്റി ഓടുന്നതിനിടയില്‍ എസ്.ഐ തടയുകയായിരുന്നു. തുടര്‍ന്ന് എസ്.ഐയെ അടിച്ചുവീഴ്ത്തിയ ശേഷം പ്രതി ഓടിരക്ഷപ്പെട്ടു. ഓട്ടത്തിനിടയില്‍ വീണു പരുക്കേറ്റ പ്രതി മാഹി ഗവണ്‍മെന്റ് ആശുപത്രിയില്‍ ചികിത്സ തേടിയതറിഞ്ഞ പൊലിസ് ആശുപത്രിയില്‍ നിന്നും തിരികെ വരുമ്പോള്‍ പിടികൂടുകയായിരുന്നു.
നേരത്തെ ബൈക്ക് മോഷ്ടിച്ച കേസിലെ പ്രതിയാണ് ഷാഹിദെന്ന് പൊലിസ് പറഞ്ഞു. പ്രതിയെ ഇന്നു കോടതിയില്‍ ഹാജരാക്കും.

.