മൂവാറ്റുപുഴ: വികസന പ്രവര്‍ത്തനങ്ങള്‍ സാധാരണക്കാരിലെത്തിയാലെ സമഗ്രവികസനം പൂര്‍ത്തീകരിക്കാന്‍ കഴിയുകയുള്ളൂവെന്ന് മുഖ്യമന്ത്രി പിണറായി വിജയന്‍ പറഞ്ഞു. മൂവാറ്റുപുഴയില്‍ കെ.എസ്.കെ.ടി.യു സംസ്ഥാന സമ്മേളനത്തിന് സമാപനം കുറിച്ച് നടന്ന പൊതുസമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ദുര്‍ബല വിഭാഗങ്ങളോട് പ്രതിബന്ധതയുള്ള സര്‍ക്കാരാണ് കേരളം ഭരിക്കുന്നത്. ഓണക്കാലത്ത് 3200 കോടിയോളം രൂപയുടെ ക്ഷേമപെന്‍ഷനുകള്‍ വീടുകളില്‍ എത്തിച്ചത് ഇതിനുദാഹരണമാണന്നും പിണറായി പറഞ്ഞു.
  സംസ്ഥാനത്തെ കാര്‍ഷിക രംഗം ഒരുപാട് പിന്നോട്ട് പോയി. ആവശ്യത്തിനു ഭക്ഷ്യധാന്യങ്ങള്‍ ഉല്‍പ്പാദിപ്പിക്കാന്‍ കഴിയുന്നില്ല. ഈ അവസ്ഥയ്ക്ക് മാറ്റം വരുത്താനാണ് സര്‍ക്കാര്‍ ഹരിത കേരളം മിഷന്‍ പദ്ധതി നടപ്പിലാക്കുന്നതെന്നും പിണറായി പറഞ്ഞു. കേരളത്തിലെ കുളങ്ങള്‍, തോടുകള്‍, നീരുറവകള്‍ എന്നിവ സംരക്ഷിക്കാന്‍ ഹരിത കേരളം മിഷന്റെ പ്രവര്‍ത്തനങ്ങള്‍ കൊണ്ടു കഴിയുമെന്നും അദ്ദേഹം പറഞ്ഞു.
കര്‍ഷക തൊഴിലാളി യൂനിയന്‍ സംസ്ഥാന പ്രസിഡന്റ് എം.വി ഗോവിന്ദന്‍ അധ്യക്ഷത വഹിച്ചു. എ.വിജയരാഘവന്‍, തിരുനാവക്കരഷ്, സുനില്‍ ചോപ്ര, പി.രാജീവ്, ജോയ്‌സ് ജോര്‍ജ് എം.പി, പി.കെ ബിജു എം.പി, ലളിതാ ബാലന്‍, സി.എന്‍ മോഹനന്‍, പി.ആര്‍ മുരളീധരന്‍, പി.എം ഇസ്മയില്‍, ഗോപി കോട്ടമുറിയ്ക്കല്‍, ഉഷ ശശീദരന്‍ പ്രസംഗിച്ചു.