മലപ്പുറം: അഞ്ഞൂറ്, ആയിരം രൂപ നോട്ടുകള്‍ അസാധുവാക്കിയതോടെ ജില്ലയില്‍ അനുഭവപ്പെട്ട സാമ്പത്തിക പ്രതിസന്ധി രണ്ടാംദിനവും തുടരുന്നു. കൈയിലുള്ള പണം അക്കൗണ്ടുകളില്‍ നിക്ഷേപിക്കാനെത്തിയവരും നോട്ടുകള്‍ മാറ്റി വാങ്ങാനെത്തിയവരും മണിക്കൂറുകളോളം വരിയില്‍ നില്‍ക്കേണ്ടി വന്നു. ജില്ല യിലെ പ്രധാന ദേശസാത്കൃത ബാങ്കുകളിലെല്ലാം ജനങ്ങളുടെ ക്യൂ റോഡിലേക്ക് നീണ്ടു.
ആദ്യദിനം പണം നിക്ഷേപിക്കാന്‍ കഴിയാത്തവരും നോട്ടുകള്‍ മാറ്റാന്‍ കഴിയാത്തവരും തിരക്കൊഴിയാന്‍ രണ്ടാം ദിവസത്തേക്ക് കാത്തിരുന്നവരും ഒഴുകിയെത്തിയതോടെ ബാങ്കുകളില്‍ വന്‍തിരക്കാണ് അനുഭവപ്പെട്ടത്. അതിനിടെ, ഇന്നലെ മുതല്‍ എ.ടി.എം വഴി ഇടപാട് നടത്താമെന്നറിഞ്ഞ് നിരവധി പേര്‍ എ.ടി.എമ്മുകളില്‍ എത്തിയെങ്കിലും മിക്ക എ.ടി.എമ്മുകളും രാവിലെയോടെ തന്നെ കാലിയായിരുന്നു. അതിരാവിലെ മുതല്‍ ജില്ലയിലെ പ്രധാന നഗരങ്ങളിലെല്ലാം എ.ടി.എം കൗണ്ടറുടെ മുന്നില്‍ ഉപഭോക്താക്കളുടെ നീണ്ട നിര രൂപപ്പെട്ടിരുന്നു. അവശ്യസാധനങ്ങളടക്കം വാങ്ങാന്‍ പണമില്ലാതെ വലഞ്ഞ സാധാരണക്കാര്‍ മണിക്കൂറുകള്‍ ക്യൂ നിന്ന് വൈകിട്ടോടെയാണ് പുതിയ രണ്ടായിരം രൂപ നോട്ടുകള്‍ കൈപറ്റിയത്. മിക്ക ബാങ്കുകളിലും പുതിയ കറന്‍സികള്‍ തീര്‍ന്നത് ജനങ്ങളെ വലച്ചു. അവസാനം ക്യൂവിലുണ്ടായിരുന്നവര്‍ക്ക് ടോക്കണ്‍ നല്‍കി ഇന്ന് ലഭ്യമാക്കാമെന്ന ഉറപ്പില്‍ പറഞ്ഞയക്കുകയായിരുന്നു. വെള്ളിയാഴ്ചയായതിനാല്‍ ബാങ്കിലെ നീണ്ട ക്യൂ പലര്‍ക്കും പ്രയാസം സൃഷ്ടിച്ചു. അന്യസംസ്ഥാന തൊഴിലാളികളക്കമുള്ളവര്‍ പാടുപെട്ടാണ് പുതിയ നോട്ടുകള്‍ കൈപറ്റിയത്.

നാലായിരം മാത്രം; ബാക്കി 24ന് ശേഷം

പിന്‍വലിച്ച പണം കൈമാറാന്‍ സര്‍ക്കാര്‍ ഒരുക്കിയ മാനദണ്ഡങ്ങളും ഗുണഭോക്താക്കള്‍ക്ക് വിനയായി. അടുത്ത 24 വരെ ഒരാള്‍ക്ക് ഒരു തവണയേ പണം കൈമാറ്റത്തിനു അവസരമുള്ളൂ. നാലായിരം രൂപയാണ് ഇങ്ങനെ കൈമാറാവുന്നത്. എന്നാല്‍ ഇതറിയാതെ കഴിഞ്ഞ ദിവസം പണം മാറിയവര്‍ ഇന്നലെയും മിക്ക ബാങ്കുകളിലും വരി നിന്നു മടങ്ങി. അടുത്ത ദിവസങ്ങളില്‍ വിവാഹം നിശ്ചയിച്ചവര്‍, ഫീസ് അടക്കാനുള്ള വിദ്യാര്‍ഥികള്‍, കൂലിപ്പണിക്കാര്‍ തുടങ്ങിയവരെയാണ് ഇതു കൂടുതല്‍ ബുദ്ധിമുട്ടിക്കുന്നത്. അതേസമയം ഒരുതവണ പോലും ബാങ്കുകളിലെത്തുന്നവര്‍ക്കും ഡെപ്പോസിറ്റുകളില്‍ നിന്നു പിന്‍വലിക്കുന്നവര്‍ക്കും ആവശ്യമായ പണം ലഭ്യമാവുന്നില്ലെന്നു ബാങ്ക് അധികൃതര്‍ പറയുന്നു

രണ്ടായിരത്തിനു ചില്ലറ വേണം

പണം മാറാന്‍ ബാങ്കിലെത്തിയവര്‍ക്ക് രണ്ടായിരത്തിന്റെ നോട്ട് അതിശയമായെങ്കിലും ചില്ലറ ഒത്തുകിട്ടാന്‍ പാടുപെട്ടു. ആയിരത്തിനു പകരം കിട്ടിയ രണ്ടായിരം 'വാങ്ങി കുടുങ്ങി'യവരാണ് അധികവും. രണ്ടായിരം രൂപയുടെ നോട്ടിനു ചില്ലറയില്ലാതായതോടെ പുത്തന്‍ പണം കിട്ടിയവര്‍ പേഴ്‌സിലൊതുക്കി.
പത്ത്, ഇരുപത് രൂപ നോട്ടുകള്‍ കഴിഞ്ഞതോടെയാണ് രണ്ടായിരം കൊണ്ട് തൃപ്തിപ്പെടേണ്ടി വന്നത്.
എ.ടി.എമ്മുകളില്‍ നൂറ്, അന്‍പത് രൂപയുടെ നോട്ടുകളാണ് ഉപയോഗിക്കുന്നത്. രണ്ടായിരത്തിന്റെ നോട്ടുകള്‍ എ.ടി.എമ്മുകളിലെത്തിയിട്ടില്ല.