കൊച്ചി: ഭിന്നശേഷിക്കാരോടുള്ള  നിലവിലെ സമീപനം തിരുത്തുകയെന്നതാണ് സര്‍ക്കാര്‍ നിലപാടെന്ന് ധനമന്ത്രി തോമസ് ഐസക്ക് പറഞ്ഞു. ആവശ്യപ്പെടുന്നവര്‍ക്ക് സഹായങ്ങള്‍ ചെയ്തുവരുന്ന നിലപാടാണ് ഇതുവരെയുണ്ടായിരുന്ന സര്‍ക്കാരുകള്‍ ചെയ്തുവന്നത്. എന്നാല്‍ ഭിന്നശേഷിക്കാരെ സമൂഹത്തിന്റെ മുഖ്യധാരയിലേക്ക് കൊണ്ടുവരാന്‍ അവര്‍ക്ക് ആവശ്യമായ സഹായങ്ങള്‍ ലഭ്യമാക്കാന്‍ ഈ സര്‍ക്കാര്‍ തയാറാണെന്നും മന്ത്രി  കൂട്ടിച്ചേര്‍ത്തു. കേരള ഫെഡറേഷന്‍ ഓഫ് ദി ബ്ലൈന്‍ഡ് സംസ്ഥാന സമ്മേളനത്തിന്റെ പ്രതിനിധി സമ്മേളനം മഹാരാജാസ് കോളജില്‍ ഉദ്ഘാടനം ചെയ്യുകയായിരുന്നു അദ്ദേഹം.
അഞ്ച് വര്‍ഷത്തിനുള്ളില്‍ 30 വയസില്‍ താഴെയുള്ള  കാഴ്ചശേഷിയില്ലാത്ത എല്ലാവര്‍ക്കും സോഫ്റ്റ്‌വെയറില്‍ (അസിസ്റ്റീവ് ടെക്‌നോളജിയില്‍) പരിശീലനം നല്‍കാനുള്ള ഉത്തരവാദിത്തം സര്‍ക്കാര്‍ ഏറ്റെടുക്കും. കേരളത്തില്‍ ഇതിനായി പലകേന്ദ്രങ്ങളില്‍ സജ്ജീകരണം ഉണ്ടാക്കുമെന്നും മന്ത്രി പറഞ്ഞു.  ഭിന്നശേഷിക്കാര്‍ തുടങ്ങുന്ന സ്വയം തൊഴില്‍ സംരംഭങ്ങള്‍ക്ക് ബാങ്ക്‌വായ്പയും സബ്‌സിഡിയും നല്‍കാന്‍ സര്‍ക്കാര്‍ എല്ലാവിധ സഹകരണങ്ങളും നല്‍കും.
സാധനങ്ങള്‍ വിറ്റഴിക്കുന്നതിനും സര്‍ക്കാര്‍ സഹായം ലഭ്യമാക്കുമെന്നും മന്ത്രി കൂട്ടിച്ചേര്‍ത്തു. ഭിന്നശേഷിക്കാര്‍ വാങ്ങുന്ന വാഹനങ്ങളുടെ നികുതി സര്‍ക്കാര്‍ തിരിച്ചു നല്‍കുന്നതിനെക്കുറിച്ച് ആലോചിച്ച് തീരുമാനം എടുക്കും. കാഴ്ചയില്ലാത്തവര്‍ക്ക് ലഭിക്കുന്ന പെന്‍ഷന്‍ തുക കൂട്ടുന്ന കാര്യവും പരിശോധിക്കും. ഭിന്നശേഷിക്കാരുടെ സ്‌കൂളുകള്‍ക്ക് ഉടന്‍ ഗ്രാന്റ് അനുവദിക്കുമെന്നും മന്ത്രി പറഞ്ഞു.
കേരള ഫെഡറേഷന്‍ ഓഫ് ദി ബ്ലൈന്‍ഡ് സംസ്ഥാന പ്രസിഡന്റ് സി.കെ അബൂബക്കര്‍ അധ്യക്ഷതവഹിച്ചു. ജനറല്‍ സെക്രട്ടറി ടി.എന്‍ മുരളീധരന്‍, റോയി വര്‍ഗീസ്, ടോണി തോമസ്, മഹാരാജാസ് കോളജ് പ്രിന്‍സിപ്പല്‍ ഡോ.കെ.എല്‍ ബീന എന്നിവര്‍ സംസാരിച്ചു. ഉച്ചയ്ക്ക് ശേഷം നടന്ന വനിതാസംഗമം ജില്ലാപഞ്ചായത്ത് പ്രസിഡന്റ് ആശ സനില്‍ ഉദ്ഘാടനം ചെയ്തു.