കാവനൂര്‍: കിഴിശ്ശേരി ഉപജില്ലയില്‍ കായികമേള നടത്താന്‍  ഗ്രൗണ്ടില്ലാത്തത് മത്സരാര്‍ഥികള്‍ക്കും അധ്യാപകര്‍ക്കും ദുരിതമാകുന്നു. എട്ടുഹൈസ്‌കൂളുകളും 19 യു.പി സ്‌കൂളുകളുമടക്കം 55 ലധികം സ്‌കൂളുകളുള്ള ഉപജില്ലയിലെ പരിധിയില്‍ സ്‌പോര്‍ട്‌സ് നടത്താന്‍ ആവശ്യമായ 200 മീറ്ററെങ്കിലും വരുന്ന ഗ്രൗണ്ടില്ലാത്തതാണ്  കായിക താരങ്ങളെ കുഴക്കുന്നത്.
ജില്ലാ സ്‌കൂള്‍ കായികമേളയില്‍ സ്ഥിരമായി ആദ്യ അഞ്ചിനുള്ളില്‍ സ്ഥാനം നേടാറുള്ള ഉപജില്ലക്കാര്‍ അരീകോട് തെരട്ടമ്മല്‍ ഗ്രൗണ്ടിലാണ് ഉപജില്ലാ കായികമേള നടത്താറുള്ളത്. ഉപജില്ലയെ പ്രതിനിധീകരിച്ച്   പതിവായി സംസ്ഥാന മീറ്റില്‍ മെഡല്‍ നേടുന്ന പൂക്കൊളത്തൂര്‍ സി.എച്ച്.എം.എച്ച്.എസ്.എസിലെ ഗ്രൗണ്ട് പോലും 160 മീറ്റര്‍ നീളം മാത്രമാണുള്ളത്.
മറ്റു ഉപജില്ലകളില്‍ മികച്ച സൗകര്യത്തില്‍ കായികമേള നടക്കുമ്പോള്‍ അന്‍പതിലധികം വിദ്യാലയങ്ങളുള്ള കിഴിശ്ശേരി ഉപജില്ലയില്‍ സൗകര്യമുള്ള ഗ്രൗണ്ട് പോലുമില്ലാത്തത് അധികൃതരുടെ ശരിയായ ഇടപെടലില്ലാത്തതാണെന്ന് ആക്ഷേപമുയര്‍ന്നിട്ടുണ്ട്. പുല്‍പറ്റ, കുഴിമണ്ണ, ചീക്കോട്, മുതുവല്ലുര്‍ പഞ്ചായത്തുകളിലെ സ്‌കൂളുകളാണ് ഉപജില്ലയില്‍ വരുന്നത്.
ഇന്നലെ   കൊണ്ടോട്ടി ഇ.എം.ഇ.എ ഗ്രൗണ്ടില്‍ ആരംഭിച്ച ഉപജില്ലാ കായിക  മേളയില്‍ 1500 ല്‍ പരം കായിക താരങ്ങളാണ് മാറ്റുരക്കുന്നത്. ദൂരക്കൂടുതല്‍ കാരണം എല്‍.പി,യു.പി സ്‌കൂളുകള്‍ പലതും മത്സരത്തില്‍ നിന്നും പിന്‍ വാങ്ങിയിട്ടുണ്ട്. അടുത്ത വര്‍ഷത്തേക്കെങ്കിലും ഉപജില്ല പരിധിക്കുള്ളില്‍ 200 മീറ്റര്‍ സൗകര്യമെങ്കിലുമുള്ള ഗ്രൗണ്ട് ഉണ്ടാക്കാന്‍ അധികൃതര്‍ തയാറാവണമെന്നാണ് കായിക പ്രേമികളുടെയും വിദ്യാര്‍ഥികളുടെയും ആവശ്യം.
ആദ്യ ദിനത്തില്‍ എച്ച്.എസ്, എച്ച്.എസ്.എസ് വിഭാഗങ്ങളില്‍ 107 പോയിന്റ് നേടി സി.എച്ച്.എം.എച്ച്.എസ്.എസ് പൂക്കൊളത്തൂര്‍ ഒന്നാം സ്ഥാനത്തും 36 പോയിന്റ് നേടി ജി.എച്ച്.എസ്.എസ് കുഴിമണ്ണ രണ്ടാം സ്ഥാനത്തും 25 പോയിന്റു നേടിയ ജി.വി.എച്ച്.എസ്.എസ് ഓമാനൂര്‍, കെ.കെ.എം.എച്ച്.എസ് ചീക്കോട് എന്നിവര്‍ മൂന്നാം സ്ഥാനത്തുമാണ്.
യു.പി വിഭാഗത്തില്‍ 14 പോയിന്റ് നേടി എ.യു.പി.എസ് തൃപ്പനച്ചി ഒന്നാം സ്ഥാനത്തും 11 പോയിന്റുമായി എ.യു.പി.എസ് തോട്ടെക്കാട് രണ്ടാം സ്ഥാനത്തുമാണ്.