പൊന്നാനി: ആശങ്കയ്ക്ക് വിട നല്‍കി കാണാതായ വിദ്യാര്‍ഥി സിറാജുദീ(13)നെ കണ്ടെത്തി. എടപ്പാള്‍ ടൗണില്‍ നിന്ന് ഇന്നലെ പകല്‍ പതിനൊന്നരയോടെയാണ് സിറാജുദ്ദീനെ കണ്ടെത്തിയത്.
ദര്‍സില്‍ പഠിക്കുകയായിരുന്ന വിദ്യാര്‍ഥി കഴിഞ്ഞദിവസം സ്‌കൂളിലേക്കെന്ന് പറഞ്ഞുപോയശേഷം എടപ്പാള്‍ ടൗണിലെ ജുമാമസ്ജിദില്‍ അഭയം തേടുകയും വിവരങ്ങള്‍ തിരക്കിയ ഇമാമിനോട് കാര്യങ്ങള്‍ മറച്ചു വെക്കുകയുമായിരുന്നു. സിറാജുദ്ദീനോട് വീട്ടിലെ നമ്പര്‍ ആവശ്യപ്പെട്ടെങ്കിലും ഓര്‍മയില്ലാത്തതിനാല്‍ നല്‍കാനായില്ല. ഇതേത്തുടര്‍ന്ന് അധികൃതര്‍ പള്ളിയില്‍ തന്നെ വിദ്യാര്‍ഥിയെ താമസിക്കാന്‍ അനുവദിച്ചു. ഇതിനിടെ പത്ര, സാമൂഹ്യ മാധ്യമങ്ങളില്‍ വാര്‍ത്ത പ്രചരിച്ചതാണ് കുട്ടിയെ തിരികെ ലഭിക്കാന്‍ സഹായകമായത്. പിന്നീട് പള്ളി ഇമാം കാര്യങ്ങള്‍ ചോദിച്ചറിയുകയായിരുന്നു.
മാറഞ്ചേരി കാഞ്ഞിരമുക്ക് ബിയ്യംകെട്ടിന് സമീപം തെയ്യംവളപ്പില്‍ സിദ്ദീഖിന്റെ മകനാണ്. പടിഞ്ഞാറങ്ങാടിയിലെ ദര്‍സില്‍ പഠിക്കുന്ന സിറാജുദ്ദീന്‍ കുമാരനല്ലൂര്‍ ഗവ. ഹയര്‍ സെക്കന്‍ഡറി സ്‌കൂള്‍ എട്ടാം ക്ലാസ് വിദ്യാര്‍ഥിയുമാണ്.

.