എടപ്പാള്‍: ശബരിമല മണ്ഡല മകരവിളക്ക് കാലത്തിന് തുടക്കമായതോടെ ശബരിമലയുടെ ഔദ്യോഗിക ഇടത്താവളമായ കുറ്റിപ്പുറം മിനിപമ്പയും പൂര്‍ണസജ്ജമായി.
ആരോഗ്യവകുപ്പ്,അഗ്‌നിശമനസേന,പൊലിസ്,സേവാഭാരതി,ലൈഫ് ഗാര്‍ഡ്‌സ് തുങ്ങിയവയുടെ പവലിയനുകള്‍ തയാറായി.
വിവിധ വകുപ്പുകളുടെ സേവനങ്ങള്‍ കഴിഞ്ഞ ദിവസം മുതല്‍ ആരംഭിച്ചു. തവനൂര്‍ പഞ്ചായത്തിന്റെ നേതൃത്വത്തില്‍ തീര്‍ഥാടകര്‍ക്കായുള്ള ആരോഗ്യശുചിത്വ സുരക്ഷാപദ്ധതിക്കും തുടക്കമായി. കൂടാതെ അയ്യപ്പസേവാ സംഘത്തിന്റെ നേതൃത്വത്തില്‍ മിനിപമ്പയില്‍ നടക്കാറുള്ള സൗജന്യ അന്നദാന ക്യാംപിനും തുടക്കമായി.
തീര്‍ഥാടനകാലം കഴിയുന്നതുവരെ മുഴുവന്‍ സമയവും മിനിപമ്പയില്‍ സൗജന്യ അന്നദാനം ഉണ്ടാകും. കഴിഞ്ഞ ദിവസം മുതല്‍ തന്നെ മിനി പമ്പയില്‍ ഇതരസംസ്ഥാനങ്ങളില്‍നിന്നുള്ളവരടക്കമുള്ള തീര്‍ഥാടകരെത്തിച്ചേരാനാരംഭിച്ചു.