തേഞ്ഞിപ്പലം: ലോറിത്തൊഴിലാളികള്‍ നടത്തിയ സമരത്തെ തുടര്‍ന്ന് വെള്ളിയാഴ്ച ചേളാരി ഇന്ത്യന്‍ ഓയില്‍ കോര്‍പറേഷന്റെ പാചക വാതക ഫില്ലിങ് പ്ലാന്റ് പ്രവര്‍ത്തനം ഭാഗികമായി മുടങ്ങി. വ്യാഴാഴ്ച രാത്രി സിലിണ്ടറുകള്‍ കയറ്റുമാന്‍ ഒരു ലോറിയില്‍ താല്‍ക്കാലികക്കാരനായ ഡ്രൈവര്‍ എത്തിയതാണ് പ്രശ്‌നങ്ങള്‍ക്കിടയാക്കിയത് . ഈ ഡ്രൈവറെ പ്ലാന്റിലെ ബി.എം.എസ് തൊഴിലാളികള്‍ തടഞ്ഞിരുന്നു. തര്‍ക്കത്തെ  തുടര്‍ന്ന് വ്യാഴാഴ്ച രാത്രി എട്ടരയോടെ തന്നെ  പ്ലാന്റ് പ്രവര്‍ത്തനം തടസപ്പെട്ടിരുന്നു.
        ഡ്രൈവറെ തടഞ്ഞതില്‍ പ്രതിഷേധിച്ച് വെള്ളിയാഴ്ച രാവിലെ സി.ഐ.ടി.യു തൊഴിലാളികള്‍ ജോലിക്ക് കയറിയില്ല. ബി.എം.എസ്, ഐ.എന്‍.ടി.യു.സി വിഭാഗക്കാര്‍ മാത്രം ജോലിക്ക് എത്തിയതിനാല്‍ പ്ലാന്റ് പ്രവര്‍ത്തനം ഭാഗികമായി. പ്ലാന്റ് മാനേജരുമായി തൊഴിലാളി സംഘടനാ പ്രതിനിധികള്‍ നടത്തിയ ചര്‍ച്ചയെ തുടര്‍ന്നാണ് ഉച്ചയോടെ പ്രശ്‌നങ്ങള്‍ക്ക് താല്‍ക്കാലിക പരിഹാരമായതും പ്ലാന്റ് പ്രവര്‍ത്തനം സാധാരണ ഗതിയിലായതും.
 പ്ലാന്റ് പ്രവര്‍ത്തനം ഭാഗികമായി  തടസപ്പെട്ടതോടെ വെള്ളിയാഴ്ച രാവിലത്തെ ഷിഫ്റ്റില്‍  25 ലോഡാണ് അയച്ചത്. 60 ലോഡ് സിലിണ്ടറുകള്‍ കയറ്റി അയക്കേണ്ട സ്ഥാനത്താണിത്.  അതിനിടെ എന്തൊക്കെ പ്രശ്‌നങ്ങള്‍ ഉണ്ടായാലും പ്ലാന്റ് പ്രവര്‍ത്തനം മുടങ്ങാതിരിക്കാന്‍ എല്ലാവരും സഹകരിക്കണമെന്ന് പ്ലാന്റ് അധികൃതരും, തൊഴിലാളി സംഘടനാ ഭാരവാഹികളും ആവശ്യപ്പെട്ടു.