ബുലവായോ: ത്രിരാഷ്ട്ര പരമ്പരയിലെ നാടകീയ പോരാട്ടത്തില്‍ വെസ്റ്റിന്‍ഡീസിനെ സിംബാബ്‌വേ ടൈയില്‍ പിടിച്ചു. ആദ്യം ബാറ്റു ചെയ്ത സിംബാബ്‌വെ 50 ഓവറില്‍ 257 റണ്‍സിനു എല്ലാവരും പുറത്തായി. വിജയം തേടിയിറങ്ങിയ വിന്‍ഡീസിന്റെ പോരാട്ടം 50 ഓവറില്‍ എട്ടു വിക്കറ്റ് നഷ്ടത്തില്‍ 257ല്‍ അവസാനിപ്പിച്ചാണ് സിംബാബ്‌വേ മത്സരം ടൈയിലെത്തിച്ചത്.
അവസാന ഓവറില്‍ വിന്‍ഡീസിനു ജയിക്കാന്‍ ആറു പന്തില്‍ നാലു റണ്‍സ് മതിയായിരുന്നു. ടിരിപനോ എറിഞ്ഞ ഓവറിന്റെ ആദ്യ പന്തില്‍ ഹോള്‍ഡര്‍ ഒരു റണ്‍സെടുത്തു. രണ്ടാം പന്തില്‍ ബ്രാത്‌വയ്റ്റ് പുറത്ത്. മൂന്നാം പന്തില്‍ നഴ്‌സ് റണ്ണൗട്ട്.
നാലാം പന്തിലും അഞ്ചാം പന്തിലും ഒരോ റണ്‍സ്. അവസാന പന്തില്‍ വിന്‍ഡീസിനു ജയിക്കാന്‍ ഒരു പന്തില്‍ ഒരു റണ്‍. എന്നാല്‍ ഹോള്‍ഡറെ പുറത്താക്കി ടിരിപനോ വിന്‍ഡീസിനു വിജയം നിഷേധിച്ചു.
മൂന്നിനു 220 എന്ന ശക്തമായ നിലയില്‍ നിന്നാണ് വിന്‍ഡീസ് തകര്‍ന്നത്. വിന്‍ഡീസിനായി ഷൈ ഹോപ് കന്നി സെഞ്ച്വറിയുമായി മികവു പുലര്‍ത്തി.
78 റണ്‍സുമായി ക്രെയ്ഗ് ബ്രാത്‌വയ്റ്റ് ഹോപിനു പിന്തുണ നല്‍കി. നേരത്തെ 92 റണ്‍സെടുത്ത ക്രെയ്ഗ് ഇര്‍വിന്‍, 77 റണ്‍സെടുത്ത സികന്ദര്‍ റാസ എന്നിവരുടെ ബാറ്റിങാണ് സിംബാബ്‌വേയ്ക്ക് തുണയായത്.