കൊച്ചി:15-ാമത് എറണാകുളം റവന്യൂ ജില്ലാ കായികമേള 22ന് മഹാരാജാസ് കോളജ് സ്‌റ്റേഡിയത്തില്‍ ആരംഭിക്കും.
മൂന്ന് ദിവസങ്ങളിലായി നടക്കുന്ന നടക്കുന്ന മേള ഹൈബി ഈഡന്‍ എം.എല്‍.എ ഉദ്ഘാടനം ചെയ്യും.എസ് ശര്‍മ്മ എംഎല്‍എ അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്റ് ആശ സനില്‍,കോര്‍പറേഷന്‍ ഡെപ്യൂട്ടി മേയര്‍ ടി.ജെ വിനോദ് എന്നിവര്‍ പങ്കെടുക്കും. 24ന് വൈകിട്ട് 4ന് നടക്കുന്ന സമാപനസമ്മേളനം പി.ടി തോമസ് എം.എല്‍.എ ഉദ്ഘാടനം ചെയ്യും എം.സ്വരാജ് എം.എല്‍.എ അധ്യക്ഷത വഹിക്കും.
മേയര്‍ സൗമിനി ജെയിന്‍ വിജയികള്‍ക്കുള്ള സമ്മാനദാനവും കെ.ജെ മാക്‌സി എം.എല്‍.എ പുരസ്‌കാര വിതരണവും നിര്‍വഹിക്കും. കോര്‍പറേഷന്‍ വിദ്യാഭ്യാസ സ്റ്റാന്‍ഡിംങ് കമ്മിറ്റി ചെയര്‍പേഴ്‌സണ്‍ പൂര്‍ണ്ണിമ നാരായണന്‍ മുഖ്യാതിഥിയായിരിക്കും. ജില്ലയിലെ 14 സബ്ജില്ലകളില്‍ നിന്നായി മൂവായിരത്തിലധികം കായികതാരങ്ങളാണ് മേളയില്‍ മാറ്റുരക്കുന്നത്.
സബ്ജൂനിയര്‍,ജൂനിയര്‍,സീനിയര്‍ ആണ്‍-പെണ്‍ വിഭാഗങ്ങളിലായി 93 ഇനങ്ങളിലായിരിക്കും മത്സരങ്ങള്‍ നടക്കുക.മേളയില്‍ യഥാക്രമം ഒന്നും രണ്ടും മൂന്നും സ്ഥാനങ്ങള്‍ നേടുന്നവര്‍ ഡിസംബര്‍ മൂന്നു മുതല്‍ തേഞ്ഞിപ്പാലത്ത് നടക്കുന്ന സംസ്ഥാനസ്‌കൂള്‍ കായികമേളയില്‍ ജില്ലയെ പ്രതിനിധീകരിക്കും. വാര്‍ത്താസമ്മേളനത്തില്‍ ജില്ലാ വിദ്യാഭ്യാസ ഉപഡയറക്ടര്‍ സി.എ സന്തോഷ് ,ജില്ലാ സ്‌പോര്‍ട്‌സ് കോര്‍ഡിനേറ്റര്‍ ജോസ് ജോണ്‍, പബ്ലിസിറ്റി ജോ.കണ്‍വീനര്‍ ടി.യു സാദത്ത് എന്നിവര്‍ പങ്കെടുത്തു.