തളിപ്പറമ്പ്: പൂക്കോത്ത്‌നടക്കു സമീപം നാലു വാഹനങ്ങള്‍ കൂട്ടിയിടിച്ച് ആറു പേര്‍ക്ക് പരുക്കേറ്റു. ഇന്നലെ വൈകുന്നേരം നാലോടെയായിരുന്നു കണ്ണൂരിലേക്ക് പോകുകയായിരുന്ന ട്രാന്‍സ്‌പോര്‍ട് ബസ് നീലേശ്വരത്തേക്കു പോകുകയായിരുന്ന കാറില്‍ ഇടിച്ചത്. കാറിനു പിന്നില്‍ ബി.എസ്.എന്‍.എല്ലിനു വേണ്ടി കരാര്‍ സര്‍വിസ് നടത്തുന്ന കാറും അതിനു പിന്നില്‍ മറ്റൊരു കാറും ഇടിച്ചു. കെ.എസ്.ആര്‍.ടി.സിയുമായി കൂട്ടിയിടിച്ച കാറിലുണ്ടായിരുന്ന കേരളാ ബീഡി സിഗാര്‍ ക്ഷേമനിധി ബോര്‍ഡ് ചെയര്‍മാനും സി.പി.എം കാസര്‍കോട് ജില്ലാ കമ്മറ്റി അംഗവുമായ നീലേശ്വരത്തെ കെ ബാലകൃഷ്ണന്‍(68), ദിനേശ് ബീഡി കേന്ദ്രസംഘം ഡയരക്ടര്‍ കാസര്‍കോട് പെരുമ്പള ബേനൂരിലെ എം സരോജിനി(27) എന്നിവരെ തളിപ്പറമ്പ് ലൂര്‍ദ്ദ് ആശുപത്രിയില്‍ പ്രാഥമിക ചികിത്സക്കു ശേഷം പരിയാരം മെഡിക്കല്‍ കോളജിലേക്ക് മാറ്റി. ബാലകൃഷ്ണന്റെയും സരോജിനിയുടെയും പരുക്ക് സാരമുള്ളതാണ്. ബസ് യാത്രക്കാരായ വടകരയിലെ എം.ടി അനുശ്രീ(21), കമ്പില്‍കടവിലെ കെ.വി ഗൗരി(48), പിലാത്തറയിലെ പി.എ ബിന്ദു(35), കൂത്തുപറമ്പിലെ സി ആര്യ(19) എന്നിവരെ ലൂര്‍ദ്ദ് ആശുപത്രിയില്‍ പ്രവേശിപ്പിച്ചു.