ഇരവിപുരം: യാത്രക്കാര്‍ മുഴുവന്‍ കയറുന്നതിന് മുന്‍പ് ട്രെയിന്‍ പ്ലാറ്റ്‌ഫോമില്‍ നിന്നു നീങ്ങിയതിനെ തുടര്‍ന്ന് ചങ്ങല വലിച്ചു ട്രെയിന്‍ നിര്‍ത്തി. ഇതു മൂലം പത്തു മിനിട്ടോളം ട്രെയിന്‍ പ്ലാറ്റ്‌ഫോമിനു പുറത്ത് നിര്‍ത്തിയിടേണ്ടി വന്നു.
ഇരവിപുരം റെയില്‍വെ സ്റ്റേഷനില്‍ ഇന്നലെ വൈകിട്ട് ആറേമുക്കാലോടെയായിരുന്നു സംഭവം. ഇരുപത് മിനിറ്റോളം വൈകിയാണ് മധുര പാസഞ്ചര്‍ സ്റ്റേഷനിലെത്തിയത്. വര്‍ക്കലയിലേക്കു പോകാന്‍ വന്ന അഞ്ചംഗസംഘത്തില്‍പ്പെട്ട രണ്ടു കുട്ടികള്‍ ഉള്‍പ്പടെ മൂന്നുപേര്‍ ട്രെയിനില്‍ കയറി. ഇതിനിടയില്‍ ട്രെയിന്‍ മുന്നോട്ടു നീങ്ങുകയായിരുന്നു.
ഈ സമയം തൊട്ടടുത്തുള്ള ട്രാക്കിലൂടെ കൊല്ലം ഭാഗത്തേക്ക് മറ്റൊരു ട്രെയിന്‍ കടന്നു പൊയ്‌ക്കൊണ്ടിരുന്നതിനാല്‍ മധുര പാസഞ്ചറിലെ പുറകിലത്തെ ബോഗിയിലുണ്ടായിരുന്ന ഗാര്‍ഡ് ആ ട്രെയിനിന് സിഗ്നല്‍ നല്‍കുകയായിരുന്നു.
അപ്പോഴാണ് ട്രെയിനില്‍ കയറാന്‍ കഴിയാതെ പോയവരുടെ കൂട്ട നിലവിളിയും പ്ലാറ്റ്‌ഫോമിനടുത്തുണ്ടായിരുന്നവരുടെ ബഹളവും ഗാര്‍ഡിന്റെ ശ്രദ്ധയില്‍പ്പെട്ടത്.ഗാര്‍ഡ് സന്ദേശം നല്‍കാന്‍ ഒരുങ്ങുന്നതിനിടെ യാത്രക്കാരിലാരോ ചങ്ങല വലിച്ച് ട്രെയിന്‍ നിര്‍ത്തി. തുടര്‍ന്ന് ഗാര്‍ഡ് എല്ലാ ബോഗികളിലും കയറിയിറങ്ങിയെങ്കിലും ആരാണ് ചങ്ങല വലിച്ചതെന്ന് കണ്ടെത്താനായില്ല.