ന്യൂഡല്‍ഹി: നോട്ട് പിന്‍വലിച്ചതടക്കമുള്ള വിഷയങ്ങളില്‍ പാര്‍ലമെന്റിന്റെ ശീതകാലസമ്മേളനത്തിന്റെ നാലാംദിവസവും സ്തംഭിച്ചു. വിഷയം സഭാ നടപടികള്‍ നിര്‍ത്തിവച്ച് ചര്‍ച്ചചെയ്യണമെന്നും പ്രധാനമന്ത്രി നരേന്ദ്രമോദി മറുപടി പറയണമെന്നും ആവശ്യപ്പെട്ട് ഇന്നലെ പാര്‍ലമെന്റിന്റെ ഇരുസഭകളും പ്രതിപക്ഷം സ്തംഭിപ്പിച്ചു. കാണ്‍പൂര്‍ ട്രെയിനപകടത്തില്‍ മരിച്ചവര്‍ക്ക് ആദരാഞ്ജലിയര്‍പ്പിച്ചാണ് ഇന്നലെ സഭതുടങ്ങിയത്. പിന്നാലെ എ.ടി.എമ്മുകള്‍ക്കു മുമ്പ് വരിനിന്നു മരിച്ചവര്‍ക്കും ആദരാഞ്ജലി അര്‍പ്പിക്കണമെന്ന് രാജ്യസഭയില്‍ സി.പി.എം നേതാവ് സീതാറാം യെച്ചൂരി ആവശ്യപ്പെട്ടു. ബഹളം രൂക്ഷമായതോടെ സഭ ഉച്ചയ്ക്കു മുമ്പായി മൂന്നുവട്ടം പിരിഞ്ഞു.
പണത്തിനായി എ.ടി.എമ്മുകള്‍ക്കും ബാങ്കുകള്‍ക്കും മുന്നില്‍ വരിനിന്നവരില്‍ 70ലധികം പേര്‍ മരിച്ചുവെന്നും 11 ബാങ്ക് ജീവനക്കാരും മരിച്ചെന്നും യെച്ചൂരി ചൂണ്ടിക്കാട്ടി. ബി.എസ്.പി, തൃണമൂല്‍ കോണ്‍ഗ്രസ് അംഗങ്ങളും യെച്ചൂരിയുടെ ആവശ്യത്തെ പിന്താങ്ങി നടുത്തളത്തിലിറങ്ങി. ട്രെയിനപകടത്തില്‍ മരിച്ചവര്‍ക്ക് ആദരാഞ്ജലി അര്‍പ്പിക്കുമ്പോള്‍ രാജ്യത്ത് പണത്തിനു വേണ്ടി കാത്തുനിന്ന് മരിച്ചവര്‍ക്കും ആദരാഞ്ജലി അര്‍പ്പിക്കണമെന്ന് പ്രതിപക്ഷ നേതാവ് ഗുലാം നബി ആസാദും ആവശ്യമുന്നയിച്ചു.
എന്നാല്‍, അനുശോചനം ആവശ്യപ്പെട്ട് നടത്തേണ്ട ഒന്നല്ലെന്നും അതു സ്വാഭാവികമായി ഉണ്ടാകേണ്ടതാണെന്നും രാജ്യസഭാ ഉപാധ്യക്ഷന്‍ പി.ജെ കുര്യന്‍ ചൂണ്ടിക്കാട്ടി. ഇക്കാര്യം ആവശ്യപ്പെട്ട് പ്രതിപക്ഷത്തിന് രാജ്യസഭ അധ്യക്ഷനെ സമീപിക്കാവുന്നതാണെന്നും അദ്ദേഹം പറഞ്ഞു. സഭയുടെ വികാരം ഉള്‍ക്കൊള്ളണമെന്നായിരുന്നു ഈ പരാമര്‍ശത്തിന് യെച്ചൂരി നല്‍കിയ മറുപടി. ഓരോന്നിനും ഓരോ നടപടിക്രമമുണ്ടെന്ന് ഉപാധ്യക്ഷനും ഓര്‍മിപ്പിച്ചു.
70 പേര്‍ മരിച്ചു എന്ന പറയുന്ന കണക്കിന്റെ അടിസ്ഥാനം എന്താണെന്നും പി.ജെ കുര്യന്‍ ചോദിച്ചു. ബഹളം രൂക്ഷമായതോടെ സഭ പിരിച്ചു വിട്ടു. തുടര്‍ന്ന് ചോദ്യോത്തരവേളയ്ക്കായി സഭ ചേര്‍ന്നപ്പോഴും പ്രതിപക്ഷം നടുത്തളത്തിലിറങ്ങി. ഇതോടെ രാജ്യസഭ അധ്യക്ഷന്‍ ഹമീദ് അന്‍സാരിയും സഭ പിരിച്ചു വിട്ടു.
അതിനിടെ, നോട്ടുകള്‍ അസാധുവാക്കിയ വിഷയത്തില്‍ ചര്‍ച്ചയ്ക്കു തയാറല്ലാത്ത പ്രതിപക്ഷം വിഷയം വഴി തിരിച്ചുവിടുകയാണെന്ന് ധനമന്ത്രി അരുണ്‍ ജയ്റ്റലി ആരോപിച്ചു. നോട്ട് വിഷയത്തില്‍ ചര്‍ച്ചയാകാമെന്ന് ഉപാധ്യക്ഷന്‍ വ്യക്തമാക്കിയിട്ടും പ്രതിപക്ഷം പ്രധാനമന്ത്രിക്കെതിരേ മുദ്രാവാക്യം മുഴക്കി നടുത്തളത്തില്‍ നിലയുറപ്പിച്ചു. ഉച്ചയ്ക്കു ശേഷം സഭ ചേര്‍ന്നപ്പോള്‍ കാണ്‍പൂര്‍ ട്രെയിന്‍ അപകടത്തില്‍ പ്രസ്താവന നടത്താന്‍ ജൂനിയര്‍ മന്ത്രിയെ അയച്ചത് ചൂണ്ടിക്കാട്ടിയായിരുന്നു പ്രതിപക്ഷ ബഹളം.
റെയില്‍വേ സഹമന്ത്രി രാജന്‍ ഗൊഹെയിന്‍ ആണ് രാജ്യസഭയില്‍ പ്രസ്താവന നടത്തിയത്. ഇതോടെ പ്രതിപക്ഷം മുദ്രാവാക്യം വിളികളുമായി നടുത്തളത്തിലിറങ്ങി. പ്രതിപക്ഷത്തിനെതിരേ ഭരണപക്ഷത്തു നിന്നും മുദ്രാവാക്യം വിളികളുയര്‍ന്നു. തുടര്‍ന്ന് സഭ മൂന്നു മണി വരെ ഉപാധ്യക്ഷന്‍ പിരിച്ചുവിട്ടു.
മൂന്നു മണിക്ക് സഭ ചേര്‍ന്നപ്പോള്‍ കോണ്‍ഗ്രസ് അധ്യക്ഷ സോണിയ ഗാന്ധിക്കും ഉപാധ്യക്ഷന്‍ രാഹുല്‍ ഗാന്ധിക്കുമെതിരേ മുദ്രാവാക്യം വിളിച്ച് ഭരണപക്ഷം എഴുന്നേറ്റു. നരേന്ദ്ര മോദിക്കെതിരേ മുദ്രാവാക്യം വിളിച്ച് കോണ്‍ഗ്രസും എഴുന്നേറ്റു. സമാജ് വാദി പാര്‍ട്ടി, തൃണമൂല്‍, സി.പി.ഐ, ബി.എസ്.പി അംഗങ്ങളും എഴുന്നേറ്റെങ്കിലും മുദ്രാവാക്യം വിളിച്ചില്ല. ബഹളം രൂക്ഷമായതോടെ സഭ ഇന്നലത്തേക്കു പിരിഞ്ഞതായി അധ്യക്ഷന്‍ അറിയിച്ചു.
അതേസമയം, വിഷയത്തില്‍ ലോക്‌സഭയുടെ നടുത്തളത്തിലിറങ്ങി പ്രതിഷേധിച്ച പ്രതിപക്ഷത്തോട് ടി.വിയില്‍ മുഖം കാണിക്കാനുള്ള അഭ്യാസമാണോയെന്ന് സ്പീക്കര്‍ സുമിത്ര മഹാജന്‍ ചോദിച്ചത് വാക്ക്‌പോരിനിടയാക്കി.