കരുനാഗപ്പള്ളി: ദേശീയ പാത ചങ്ങന്‍കുളങ്ങരയില്‍ ബൈക്കുകള്‍ കൂട്ടിയിടിച്ചുണ്ടായ അപകടത്തില്‍ രണ്ടു യുവാക്കള്‍ മരിച്ചു.
ക്ലാപ്പന വരവിള പുത്തന്‍ കണ്ടത്തില്‍ ഗോപിനാഥന്‍ വിജയമ്മ ദമ്പതികളുടെ മകന്‍ വിനോദ് കുമാര്‍ (34), തഴവ പാവുമ്പതെക്ക് കുറ്റി വിളയില്‍ അജയന്‍ സതിയമ്മ ദമ്പതികളുടെ മകന്‍ അഭിലാഷ് (24) എന്നിവരാണ് മരിച്ചത്. അഭിലാഷിന്റെ പിറകിലിരുന്നു യാത്ര ചെയ്തിരുന്ന പാവുമ്പ സ്വദേശി സന്ദീപി(25)നെ ഗുരുതര പരുക്കുകളോടെ ആലപ്പുഴ വണ്ടാനം മെഡിക്കല്‍ കോളജില്‍ പ്രവേശിപ്പിച്ചു.
ഞായര്‍ രാത്രി ഒമ്പതിനായിരുന്നു അപകടം. പരുക്കേറ്റവരെ നാട്ടുകാര്‍ ഓച്ചിറയിലെ ഒരു സ്വകാര്യ ആശുപത്രിയിലും അവിടെ നിന്നും വണ്ടാനം മെഡിക്കല്‍ കോളജിലും പ്രവേശിപ്പിക്കുകയായിരുന്നു.വിനോദ് കുമാര്‍ ഞായറാഴ്ച രാത്രി 10 നും, അഭിലാഷ് ചേര്‍ത്തലയിലെ ഒരു സ്വകാര്യ ആശുപത്രിയില്‍ ഇന്നലെ ഉച്ചയ്ക്ക് ഒരു മണിയോടെയുമാണ് മരിച്ചത്.
വിനോദ് കുമാറിന്റെ ഭാര്യ: രേഷ്മ, മകള്‍ ആദിവര്‍ഷ. അഭിലാഷിന്റെ സഹോദരന്‍ ആദര്‍ശ്. വിനോദ് കുമാറിന്റെ മൃതദേഹം പോസ്റ്റ്‌മോര്‍ട്ടത്തിന് ശേഷം സംസ്‌ക്കരിച്ചു. അഭിലാഷിന്റെ മൃതദേഹം നാളെ സംസ്‌ക്കരിക്കും. ഓച്ചിറ പൊലിസ് കേസെടുത്തു.