കോഴിക്കോട്: കേരളത്തിലെ മുഴുവന്‍ സര്‍ക്കാര്‍- എയ്ഡഡ് ഹൈസ്‌കൂള്‍, ഹയര്‍ സെക്കന്‍ഡറി- വൊക്കേഷനല്‍ ഹയര്‍സെക്കന്‍ഡറി ക്ലാസ് മുറികളും ഐ.ടി ലാബുകളും ഹൈടെക്കാക്കാനുള്ള പ്രവര്‍ത്തനങ്ങള്‍ നടന്നുവരികയാണെന്ന് ഐ.ടി അറ്റ് സ്‌കൂള്‍ എക്‌സിക്യുട്ടീവ് ഡയറക്ടര്‍ കെ. അന്‍വര്‍സാദത്ത്. ഹൈടെക്കാക്കുന്നതിനു മുന്നോടിയായി ഓണ്‍ലൈന്‍ സര്‍വേയില്‍ വിവരങ്ങള്‍ നല്‍കുന്നതിനായി കോഴിക്കോട് ജെ.ഡി.ടി ഇസ്‌ലാം ഹൈസ്‌കൂളില്‍ സംഘടിപ്പിച്ച സ്‌കൂള്‍ ഐ.ടി കോ- ഓര്‍ഡിനേറ്റര്‍മാരുടെ ശില്‍പശാലയില്‍ വീഡിയോ പ്രഭാഷണം നടത്തുകയായിരുന്നു അദ്ദേഹം.
ഹൈടെക് വിദ്യാലയങ്ങളാക്കുന്നതിന്റെ മുന്നോടിയായി ഐ.ടി അറ്റ് സ്‌കൂളിന്റെ നേതൃത്വത്തില്‍ കംപ്യൂട്ടര്‍ ലാബ്, ബ്രോഡ്ബാന്‍ഡ് ഇന്റര്‍നെറ്റ്, ക്ലാസ് മുറികളില്‍ ലാപ്പ്‌ടോപ്- പ്രൊജക്ടര്‍- ശബ്ദ സംവിധാനം, നെറ്റ്‌വര്‍ക്കിങ് എന്നിവ ഏര്‍പ്പെടുത്തും. എന്നാല്‍ ഇതിനു പര്യ്തമായ രീതിയില്‍ ക്ലാസ് മുറികള്‍ സജ്ജമാക്കല്‍ അതത് സ്‌കൂളുകള്‍ പൂര്‍ത്തിയാക്കണം.
ഡിസംബര്‍ അഞ്ചിന് മുന്‍പാണ് സ്‌കൂള്‍ ഓണ്‍ലൈന്‍ വിവരങ്ങള്‍ നല്‍കേണ്ടത്. അതിനുമുന്നോടിയായി സ്‌കൂള്‍ തലത്തില്‍ വിശദമായ ആലോചനായോഗങ്ങള്‍ നടത്തേണ്ടതുണ്ട്. യോഗം ജെ.ഡി.ടി സ്‌കൂള്‍ ഹെഡ്മാസ്റ്റര്‍ ഇ. അബ്ദുല്‍ ഗഫൂര്‍ ഉദ്ഘാടനം ചെയ്തു. ഐ.ടി അറ്റ് സ്‌കൂള്‍ പൊജക്ട് ജില്ലാ കോഡിനേറ്റര്‍ വി.കെ ബാബു മാസ്റ്റര്‍, ട്രയിനര്‍മാരായ കെ.ജെ പോള്‍, മുഹമ്മദ് അബ്ദുല്‍ നാസര്‍, സി.കെ മുഹമ്മദ് എന്നിവര്‍ സംസാരിച്ചു.