കോഴിക്കോട്: മലയോരം നെഞ്ചേറ്റുന്ന കായിക പ്രതിഭകളുടെ മികവില്‍ റവന്യു ജില്ലാ സ്‌കൂള്‍ കായികമേളയുടെ രണ്ടാം ദിനത്തിലും മുക്കം ഉപജില്ല വ്യക്തമായ മേധാവിത്വം തുടരുന്നു. 14 സ്വര്‍ണവും 20 വെള്ളിയും 20 വെങ്കലവും നേടി 173.5 പോയന്റുമായി മുക്കം ഒന്നാം സ്ഥാനത്ത് കുതിച്ചോടുമ്പോള്‍ രണ്ടാം സ്ഥാനത്തുള്ള താമരശ്ശേരി ഉപജില്ലക്ക് ഏഴും സ്വര്‍ണവും 11 വെള്ളിയും എട്ടു വെങ്കലവുമായി ലഭിച്ചത് 78.5 പോയിന്റാണ്. പുല്ലൂരാംപാറ സെന്റ് ജോസഫ്‌സ് ഹൈസ്‌കൂളാണ് സ്‌കൂളുകളില്‍ മുന്നിട്ടു നില്‍ക്കുന്നത്.
എട്ടു സ്വര്‍ണവും 11 വെള്ളിയും അഞ്ചു വെങ്കലവും നേടി 74.5 പോയിന്റ് നേടിയാണ് പുല്ലൂരാംപാറ സെന്റ് ജോസഫ്‌സ് ഹൈസ്‌കൂള്‍ ഒന്നാം സ്ഥാനത്ത് തുടരുന്നത്. അഞ്ചുവീതം സ്വര്‍ണവും വെള്ളിയും മൂന്നു വെങ്കലവും നേടിയ പൂവമ്പായി എ.എം.എച്ച്.എസും എട്ടു സ്വര്‍ണവും ഒരു വെള്ളിയും നേടിയ കുളത്തുവയല്‍ സെന്റ് ജോര്‍ജ്‌സ് എച്ച്.എസ്.എസും 43 പോയിന്റ് വീതം നേടി രണ്ടാം സ്ഥാനത്തുണ്ട്. മേളയിലെ വേഗമേറിയ താരങ്ങളെ കണ്ടെത്തുന്ന സീനിയര്‍ വിഭാഗം 100 മീറ്റര്‍, സീനിയര്‍ വിഭാഗം പെണ്‍കുട്ടികളുടെ 3000 മീറ്റര്‍ ഓട്ടം ഉള്‍പ്പെടെ മുപ്പതിലേറെ ഫൈനലുകളാണ് മേളയുടെ രണ്ടാം ദിനത്തില്‍ നടന്നത്.
ഇന്നു നടക്കുന്ന ഏതാനും മത്സരങ്ങളുടെ ഫൈനലോടെ 15-ാമത് ജില്ലാ കായികമേള സമാപിക്കും.