വണ്ടൂര്‍: ശാരീരിക അസ്വസ്ഥതകളെ തുടര്‍ന്നു കൂരാട് പഴേടം ജി.എം.എല്‍.പി സ്‌കൂളിലെ ഒരു ക്ലാസിലെ പതിനെട്ടു വിദ്യാര്‍ഥികളെ ആശുപത്രിയില്‍ പ്രവേശിപ്പിച്ചു. നാലാം തരത്തിലെ വിദ്യാര്‍ഥികളെയാണ് വണ്ടൂര്‍ താലൂക്ക് ആശുപത്രിയില്‍ പ്രവേശിപ്പിച്ചത്.
ഒന്‍പതു വയസുകാരായ റിന്‍സിയ തസ്‌നി, റിത, ദിയാന, ഫാത്തിമ ഹംന, അന്‍സിയ, നവ നന്ദത, ഫാത്തിമ സിതാന, ഫാത്തിമ, സന്‍ജിത്ത്, സിദാന്‍, ഫവാസ്, ഷാമില്‍, ആഷിഖ്, മുഹമ്മദ് സാബിത്ത്, റബീഹ്, സാദിഖ്, ആദില്‍ എന്നീ കുട്ടികളാണ് ചൊറിച്ചിലും അസ്വസ്ഥതയുംമൂലം ചികിത്സ തേടിയത്. ചില വിദ്യാര്‍ഥികള്‍ ചര്‍ദിക്കുകയും ചെയ്തു. ഉച്ച ഭക്ഷണം കഴിഞ്ഞ് ക്ലാസില്‍ കയറിയതോടെയാണ് അസ്വസ്ഥത തുടങ്ങിയതെന്നു വിദ്യാര്‍ഥികള്‍ പറഞ്ഞു.
പി.ടി.എ യോഗത്തിനെത്തിയവരും പഞ്ചായത്തംഗം മുഹമ്മദലിയും ചേര്‍ന്നാണ് കുട്ടികളെ ആശുപത്രിയിലെത്തിച്ചത്. എന്നാല്‍, അധ്യാപകര്‍ ആശുപത്രിയിലെത്താന്‍ വൈകിയെന്നാരോപിച്ചു പഞ്ചായത്തംഗങ്ങളടക്കമുള്ളവര്‍ ബഹളംവച്ചു. വില്ലേജ് ഓഫിസര്‍ പ്രമോദിന്റെ നേതൃത്വത്തില്‍ റവന്യൂ അധികൃതരും ആശുപത്രിയിലെത്തിയിരുന്നു.
സംഭവത്തിനു പിന്നില്‍ ഭക്ഷണത്തില്‍വന്ന പ്രശ്‌നങ്ങളല്ലെന്നും പുഴു ശല്യമോ കാറ്റില്‍ നായ്ക്കുരണപ്പൊടി പറന്നതോ ആകാമെന്നും പ്രധാനാധ്യാപിക വി. ഫാത്തിമ സുഹ്‌റ പറഞ്ഞു. വിദ്യാര്‍ഥികളെ ഡിസ്ചാര്‍ജ് ചെയ്തിട്ടുണ്ട്.