ഹാമില്‍ട്ടന്‍: ന്യൂസിലന്‍ഡിനെതിരായ രണ്ടാം ക്രിക്കറ്റ് ടെസ്റ്റിലും പാകിസ്താന്‍ തകരുന്നു. ആദ്യ ഇന്നിങ്‌സില്‍ കിവീസിനെ 271 റണ്‍സില്‍ പുറത്താക്കാന്‍ പാക് ബൗളര്‍മാര്‍ക്ക് സാധിച്ചെങ്കിലും ഒന്നാം ഇന്നിങ്‌സ് തുടങ്ങിയ പാകിസ്താന്‍ പതറുന്നു. രണ്ടാം ദിനം കളി നിര്‍ത്തുമ്പോള്‍ അവര്‍ അഞ്ചു വിക്കറ്റ് നഷ്ടത്തില്‍ 76 റണ്‍സെന്ന നിലയില്‍. അഞ്ചു വിക്കറ്റുകള്‍ ശേഷിക്കേ കിവികളുടെ സ്‌കോറിനൊപ്പമെത്താന്‍ പാകിസ്താനു 195 റണ്‍സ് കൂടി വേണം. കളി നിര്‍ത്തുമ്പോള്‍ 34 റണ്‍സോടെ ബാബര്‍ അസമും ഒന്‍പത് റണ്‍സുമായി സര്‍ഫ്രാസ് അഹമ്മദും ക്രീസില്‍. കിവീസിനു വേണ്ടി ടിം സൗത്തി മൂന്ന് വിക്കറ്റുകള്‍ വീഴ്ത്തി. മഴയെ തുടര്‍ന്നു ആദ്യ ദിനം 21 ഓവര്‍ മാത്രമാണ് മത്സരം നടന്നത്. രണ്ടിനു 77 എന്ന നിലയില്‍ രണ്ടാം ദിനം തുടങ്ങിയ കിവികള്‍ 271 റണ്‍സില്‍ വീണു.