തേഞ്ഞിപ്പലം: മലപ്പും റവന്യൂ ജില്ലാ കായികമേളയ്ക്ക് ഇന്നു കാലിക്കറ്റ് സര്‍വകലാശാല സ്‌റ്റേഡിയത്തില്‍ തുടക്കമാകും. നാളെ നടത്താനിരുന്ന മത്സരങ്ങള്‍ ഹര്‍ത്താലിനെ തുടര്‍ന്ന് ഇന്നു നടക്കുമെന്നു സംഘാടകര്‍ അറിയിച്ചു.
നാളെ മത്സരമില്ല. ചൊവ്വാഴ്ചയായിരിക്കും ബാക്കി ഇനങ്ങളില്‍ മത്സരങ്ങള്‍ നടക്കുക.
17 ഉപജില്ലകളില്‍നിന്നായി 3,500 കായിക താരങ്ങളും 150 ഒഫിഷ്യലുകളും മേളയില്‍ പങ്കെടുക്കും.
ദൂരസ്ഥലങ്ങളില്‍നിന്നെത്തുന്ന വിദ്യാര്‍ഥികള്‍ക്കു സമീപത്തെ സ്‌കൂളുകളില്‍ താമസസൗകര്യം ഒരുക്കിയിട്ടുണ്ട്.
രാവിലെ എട്ടിനു ഡി.ഡി.ഇ പി. സഫറുള്ള പതാക ഉയര്‍ത്തും. പി. അബ്ദുല്‍ ഹമീദ് എം.എല്‍.എ ഉദ്ഘാടനം ചെയ്യും.
വൈസ് ചാന്‍സലര്‍ മുഖ്യാതിഥിയാകും. ഡോ. വി.പി സക്കീര്‍ ഹുസൈന്‍ കായിക സന്ദേശം നല്‍കും.

യോഗം ചേര്‍ന്നു

മലപ്പുറം: കാലിക്കറ്റ് യൂനിവേഴ്‌സി കാംപസില്‍ ഡിസംബര്‍ മൂന്നു മുതല്‍ ആറുവരെ നടക്കുന്ന സംസ്ഥാന സ്‌കൂള്‍ കായികമേളയില്‍ പങ്കെടുക്കാനെത്തുന്നവര്‍ക്കു ശുദ്ധീകരിച്ച കുടിവെള്ളം ഉറപ്പുവരുത്തുന്നതിനും സ്റ്റേഡിയവും പരിസരവും പ്ലാസ്റ്റിക് മുക്തമാക്കുന്നതിനും വെല്‍ഫെയര്‍ കമ്മിറ്റി തീരുമാനിച്ചു.
യോഗം ചെയര്‍മാന്‍ പി. ഉബൈദുള്ള എം.എല്‍.എ ഉദ്ഘാടനം ചെയ്തു. കണ്‍വീനര്‍ ടി.പി അബ്ദുല്‍ ഹഖ്, എസ്.എ റസാഖ്, എ ഉസ്മാന്‍, ഷാഹുല്‍ ഹമീദ് മേല്‍മുറി, ടി.എ മജീദ്, സി.പി മുഹമ്മദ് കുട്ടി, കെ. ആലിക്കുട്ടി, എ.പി അബ്ദുല്‍ അലി സംസാരിച്ചു.