വടക്കാഞ്ചേരി: സ്ത്രീ വേഷം ധരിച്ചെത്തിയ അജ്ഞാതന്‍ നാലാം ക്ലാസ് വിദ്യാര്‍ഥിനിയെ ഓട്ടോറിക്ഷയില്‍ തട്ടിക്കൊണ്ടു പോകാന്‍ ശ്രമിച്ചതായി പരാതി. കുണ്ടന്നൂര്‍ സെന്റ് ജോസഫ് സ്‌കൂള്‍ വിദ്യാര്‍ഥിനി കുണ്ടന്നൂര്‍ വാലിയില്‍ സുരേന്ദ്രന്റെ മകള്‍ ഒന്‍പത് വയസുകാരിയെയാണ് തട്ടിക്കൊണ്ടു പോകാന്‍ ശ്രമിച്ചതെന്ന് കാണിച്ച് സുരേന്ദ്രന്‍ വടക്കാഞ്ചേരി പൊലിസില്‍ പരാതി നല്‍കി. കഴിഞ്ഞ ദിവസം വൈകിട്ട് ട്യൂഷന്‍ കഴിഞ്ഞ് വരുമ്പോള്‍ ഓട്ടോറിക്ഷയിലെത്തിയ സ്ത്രീ വേഷം ധരിച്ച ആള്‍ മുല്ലപൂവ് വേണോ എന്ന് ചോദിച്ച് കുട്ടിയെ അടുത്തേക്ക് വിളിച്ച് വരുത്തുകയും കൈ പിടിച്ച് ബലമായി ഓട്ടോറിക്ഷയിലേക്ക് വലിച്ച് കയറ്റാന്‍ ശ്രമിക്കുകയും ചെയ്തുവത്രെ. കുട്ടി കരഞ്ഞ് ബഹളമുണ്ടാക്കുകയും, ഇയാളുടെ കൈയില്‍ ശക്തമായി കടിക്കുകയും ചെയ്തു. ഇതിനിടയില്‍ വെപ്പ് മുടി നിലത്ത് വീണപ്പോഴാണ് പുരുഷനാണെന്ന് മനസിലായതെന്നും കുട്ടി പറയുന്നു. ഉറക്കെ കരഞ്ഞപ്പോള്‍ ഓട്ടോറിക്ഷ അതിവേഗം ഓടിച്ച് പോയതായി പെണ്‍കുട്ടി പറഞ്ഞു. ഡ്രൈവറും മറ്റൊരാളുമാണ് ഓട്ടോയിലുണ്ടായിരുന്നതെന്നും കുട്ടി പറയുന്നു. മേഖലയില്‍ സമാനമായ സംഭവം ഇതിന് മുന്‍പും ഉണ്ടായതായി നാട്ടുകാരും പറയുന്നു. തന്റെ പെണ്‍മക്കളെ തട്ടികൊണ്ടു പോകാന്‍ ശ്രമം നടത്തിയെന്ന പരാതിയുമായി കുമ്പളങ്ങാട് പുലിക്കോട്ടില്‍ വീട്ടില്‍ മാര്‍ട്ടിനും രംഗത്തെത്തി.