ന്യൂഡല്‍ഹി: ഡല്‍ഹിയില്‍ ഇന്ന് നടന്നത് ശരിക്കും ഒരു ഗോവധമായിരുന്നു. ഗോവയെ ഒന്നിനെതിരേ അഞ്ചു ഗോളുകള്‍ക്കാണ് ഡല്‍ഹി ഡൈനാമോസ് തകര്‍ത്തത്. രണ്ടു കളിക്കാര്‍ അഞ്ചു ഗോളുകള്‍. അതില്‍ ഒരാളുടെ വക ഹാട്രിക് ഗോളുകള്‍, മറ്റൊരാളുടെ വക രണ്ടു ഗോളുകളും ഇതായിരുന്നു മല്‍സരം.

പരാജയത്തോടെ ഗോവയുടെ സെമി സാധ്യത അവസാനിച്ചു. പോയിന്റ് പട്ടികയില്‍ ഡല്‍ഹി രണ്ടാം സ്ഥാനത്തേക്ക് ഉയരുകയും ചെയ്തു. ഡല്‍ഹിക്കായി മാര്‍സലോ ഹാട്രിക് ഗോളുകള്‍ നേടിയപ്പോള്‍ റിച്ചാര്‍ഡ് ഗാഡ്‌സെ രണ്ടു ഗോളുകള്‍ നേടി ഡല്‍ഹിയുടെ ക്വാട്ട തികച്ചു. ഗോവയുടെ ആശ്വാസഗോള്‍ കാര്‍ഡോസയുടെ വകയായിരുന്നു.

മല്‍സരത്തിന്റെ 38, 48, 56 മിനുറ്റുകളിലാണ് മാര്‍സലോ ലക്ഷ്യം കണ്ടത്. 51, 57 മിനുറ്റുകളിലാണ് ഗാഡ്‌സെ ഗോവയുടെ വല കുലുക്കിയത്. ഗോവയുടെ ആശ്വാസ ഗോള്‍ ആദ്യ പകുതിയുടെ 31ാം മിനുറ്റില്‍ കാര്‍ഡോസയുടെ വകയായിരുന്നു.