കല്‍പ്പറ്റ: 53ാമത് സംസ്ഥാന സീനിയര്‍ ഫുട്‌ബോള്‍ ചാംപ്യന്‍ഷിപ്പിന്റെ ഫൈനലില്‍ കോട്ടയം-തൃശൂര്‍ പോരാട്ടം. ആദ്യ സെമിയില്‍ കോട്ടയം ഒന്നിനെതിരേ മൂന്നു ഗോളുകള്‍ക്ക് തിരുവനന്തപുരത്തെ പരാജയപ്പെടുത്തി. 12ാം മിനുട്ടില്‍ പി ഷാജി പെനാല്‍റ്റി ഗോളിലൂടെ തിരുവനന്തപുരത്തെ മുന്നിലെത്തിച്ചെങ്കിലും 24ാം മിനുട്ടില്‍ ടി.ബി ബിജീഷ് കോട്ടയത്തെ ഒപ്പമെത്തിച്ചു. രണ്ടാം പകുതിയുടെ 65ാം മിനുട്ടില്‍ ആനന്ദ് മുരളിയും 87ാം മിനുട്ടില്‍ ആര്‍ ആശിഷും നേടിയ ഗോളുകള്‍ക്ക് കോട്ടയം ഫൈനലിലേക്ക് മുന്നേറുകയായിരുന്നു.
രണ്ടാം സെമിയില്‍ ആതിഥേയരായ വയനാടിനെ പരാജയപ്പെടുത്തിയാണ് തൃശൂര്‍ ഫൈനലിലേക്ക് മുന്നേറിയത്. ഒന്‍പതാം മിനുട്ടിലും 23ാം മിനുട്ടിലും സ്‌ട്രൈക്കര്‍ ബിനീഷ് ബാലനിലൂടെ തൃശൂര്‍ ആദ്യ പകുതിയില്‍ തന്നെ കളി തങ്ങളുടെ വരുതിയിലാക്കി. രണ്ടാം പകുതിയുടെ 63ാം മിനുട്ടില്‍ വയനാടിന്റെ ക്യാപ്റ്റന്‍ മുഹമ്മദ് റഫീഖ് ഒരു ഗോള്‍ മടക്കിയെങ്കിലും പ്രതിരോധം ശക്തമാക്കി തൃശൂര്‍ വിജയം ഉറപ്പിക്കുകയായിരുന്നു. ഇന്നു വൈകിട്ട് ഫൈനല്‍ അരങ്ങേറും.