കൊട്ടാരക്കര: പൊലിസ് ജീപ്പ് മിനിലോറിയിലിടിച്ച് അസിസ്റ്റന്റ് കമാന്‍ഡന്റ് ഉള്‍പ്പടെ മൂന്നു പൊലിസുകാര്‍ക്ക് പരുക്ക്. തിരുവനന്തപുരം സ്റ്റേറ്റ് ആംഡ് പൊലിസിലെ അസിസ്റ്റന്റ് കമാന്‍ഡന്റ് ചന്ദ്രചൂഡന്‍(55), പഴ്‌സണല്‍ സെക്യൂരിറ്റി ഓഫീസര്‍ വൈശാഖ് (27), ഡ്രൈവര്‍ രഞ്ജിത് മോഹന്‍(25) എന്നിവര്‍ക്കാണ് പരുക്കേറ്റത്.
സദാനന്ദപുരത്ത് എം.സി.റോഡില്‍ ഇന്നലെ ഉച്ചക്ക് ഒന്നരയോടെയായിരുന്നു അപകടം. ഗുരുതരമായി പരുക്കേറ്റ രഞ്ജിത് മോഹനെ കൊല്ലത്തെ സ്വകാര്യ ആശുപത്രിയിലും മറ്റു രണ്ടുപേരേയും തിരുവനന്തപുരം മെഡിക്കല്‍ കോളജ് ആശുപയ്രതിയിലും പ്രവേശിപ്പിച്ചു.
പമ്പയില്‍ നിന്നും തിരുവനന്തപുരത്തേക്കു പോകുകയായിരുന്ന ജീപ്പ് നിയന്ത്രണം വിട്ട് എതിരെ വന്ന മിനിലോറിയിലേക്ക് ഇടിച്ചു കയറുകയായിരുന്നു. ജീപ്പിന്റെ മുന്‍ഭാഗം പൂര്‍ണമായി തകര്‍ന്നു. വാഹനത്തിനുള്ളില്‍ കുടുങ്ങിയ ഡ്രൈവറെ പിന്നാലെയെത്തിയ പൊലിസ് വാഹനത്തിലുണ്ടായിരുന്നവരും നാട്ടുകാരും ചേര്‍ന്ന് പ്രയാസപ്പെട്ടാണ് പുറത്തെടുത്തത്. പനവേലിയില്‍ നിന്നും മരച്ചീനിയുമായി കൊട്ടാരക്കരയിലേക്കു പോകുകയായിരുന്നു ലോറി.