കണ്ണൂര്‍: ആയുധങ്ങളുമായി രണ്ടംഗ കവര്‍ച്ചാ സംഘം അറസ്റ്റില്‍. തിരുവനന്തപുരം പുല്ലമ്പാറയിലെ ജെ അന്‍സാര്‍ എന്ന ഉണ്ണി(30), തമിഴ്‌നാട് പാവട്ടി തെരുവിലെ ടി അശോക്(27) എന്നിവരെയാണ് ഇന്നലെ പുലര്‍ച്ചെ കണ്ണൂര്‍ ടൗണ്‍ എസ്.ഐ എ കുട്ടികൃഷ്ണനും സംഘവും അറസ്റ്റ് ചെയ്തത്. റെയില്‍വേ സ്റ്റേഷന്‍ പരിസരത്തെ പൂട്ടിയിട്ട കടയ്ക്കു മുന്നില്‍ നിന്നാണു ഇരുവരെയും പിടിയിലായത്.
ഇവരുടെ കൈയില്‍ നിന്നു രണ്ടു പവന്റെ സ്വര്‍ണാഭരണങ്ങളും കമ്പിപ്പാരയും ഹാക്‌സോ ബ്ലേഡുകളും കണ്ടെടുത്തു. നേരത്തെ മയ്യില്‍ പൊലിസ് സ്റ്റേഷന്‍ പരിധിയിലെ രണ്ടു കടകളില്‍ നടന്ന കവര്‍ച്ചാ കേസില്‍ ശിക്ഷിക്കപ്പെട്ടയാളാണ് അന്‍സാര്‍. ശിക്ഷ കഴിഞ്ഞു രണ്ടര മാസം മുമ്പാണ് അന്‍സാര്‍ കണ്ണൂര്‍ സെന്‍ട്രല്‍ ജയിലില്‍ നിന്നു പുറത്തിറങ്ങിയത്. ഇതിനു ശേഷം മംഗളൂരു ഉള്ളാളില്‍ നടന്ന കവര്‍ച്ചാ കേസിലും ഇയാള്‍ പിടിയിലായിരുന്നു. ഈ കേസില്‍ ജാമ്യത്തിലിറങ്ങിയാണ് ഇയാള്‍ കണ്ണൂരിലെത്തിയത്.
ചന്തേര പൊലിസ് സ്റ്റേഷന്‍ പരിധിയിലെ ബൈക്ക് മോഷണ കേസിലെ പ്രതി കൂടിയാണ് അന്‍സാര്‍. മൊബൈല്‍ കടയില്‍ മോഷണം നടത്തിയ കേസില്‍ പ്രതിയായിരുന്നു അശോക്.