കോട്ടയം:തീരുമാനങ്ങള്‍ എടുക്കുന്നതില്‍ മുഖ്യമന്ത്രി പിണറായി വിജയന് ഇരട്ടച്ചങ്കല്ല ഓട്ടച്ചങ്കാണുള്ളതെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു.
പിണറായിക്ക് ഇരട്ടച്ചങ്കാണെന്നാണ് അണികള്‍ പ്രചരിപ്പിച്ചിരുന്നത്. എന്നാല്‍, ഓട്ടച്ചങ്കനാണ് താനെന്നു വ്യക്തതയില്ലാത്ത തീരുമാനങ്ങളിലൂടെ പിണറായി തെളിയിച്ചിരിക്കുകയാണെന്നും അദ്ദേഹം പറഞ്ഞു. നിലമ്പൂര്‍ വനത്തില്‍ മാവോയിസ്റ്റുകള്‍ വെടിയേറ്റു കൊല്ലപ്പെട്ടിട്ട് ഒരാഴ്ച കഴിഞ്ഞിട്ടും മുഖ്യമന്ത്രി മൗനം വെടിയാനോ പ്രതികരിക്കാനോ തയ്യാറായിട്ടില്ല . എന്‍ജിഒ അസോസിയേഷന്‍ സംസ്ഥാന സമ്മേളനത്തിന്റെ പ്രതിനിധി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. എന്‍ജിഒ അസോസിയേഷന്‍ സംസ്ഥാന പ്രസിഡന്റ് എന്‍.രവികുമാര്‍ അധ്യക്ഷനായിരുന്നു. കെ.പി.സി.സി. വൈസ് പ്രസിഡന്റ് എം.എം. ഹസന്‍, ജോസഫ് വാഴയ്ക്കന്‍, ഡി.സി.സി. പ്രസിഡന്റ് ടോമി കല്ലാനി, കെ.പി.സി.സി. ജനറല്‍ സെക്രട്ടറി ലതികാ സുഭാഷ്, കെ.പി.സി.സി. സെക്രട്ടറി ഫിലിപ്പ് ജോസഫ്, യു.ഡി.എഫ്. ജില്ലാ കണ്‍വീനര്‍ ജോസി സെബാസ്റ്റ്യന്‍, എന്‍.കെ. ബെന്നി, ഡോ. ശോഭാ സലിമോന്‍, എം. ലിജു, കെ.വി. മുരളി, കെ.ജെ. ജോര്‍ജ്, എം.ജെ. ബോസ് ചന്ദ്രന്‍, ഇ.എന്‍. ഹര്‍ഷകുമാര്‍ എന്നിവര്‍ പ്രസംഗിച്ചു.
കേരള അഡ്മിനിസ്‌ട്രേറ്റീവ് സര്‍വ്വീസും കാര്യക്ഷമതയും എന്ന സെമിനാര്‍ തിരുവഞ്ചൂര്‍ രാധാകൃഷ്ണന്‍ എം.എല്‍.എ. ഉദ്ഘാടനം ചെയ്തു. ജയ്ഹിന്ദ് സി.ഇ.ഒ. കെ.പി. മോഹനന്‍ മുഖ്യപ്രഭാഷണം നടത്തി.