കൃഷ്ണഗിരി(വയനാട്): കൃഷ്ണഗിരിയില്‍ നടക്കുന്ന രഞ്ജി ഗ്രൂപ്പ് ബിയിലെ ഒഡിഷ- മഹാരാഷ്ട്ര മത്സരത്തില്‍ ആദ്യം ബാറ്റു ചെയ്ത ഒഡിഷ ഭേദപ്പെട്ട നിലയില്‍. വെളിച്ചക്കുറവുമൂലം ആദ്യ ദിനം സ്റ്റംപെടുക്കുമ്പോള്‍ ഒന്‍പതിന് 311 എന്ന നിലയിലാണ് ഒഡിഷ. ടോസ് നേടിയ മഹാരാഷ്ട്ര ഒഡിഷയെ ബാറ്റിങിനയക്കുകയായിരുന്നു. മുന്‍നിര ബാറ്റ്‌സ്മാന്‍മാര്‍ തകര്‍ന്നടിഞ്ഞപ്പോള്‍ മധ്യനിരയില്‍ ബിപ്‌ലബ് സാമന്ത്രയും ദീപക് ബെഹ്‌റയും നേടിയ അര്‍ധ സെഞ്ച്വറികളാണ് ഒഡിഷയെ പൊരുതാവുന്ന സ്‌കോറിലേക്ക് നയിച്ചത്. മഹാരാഷ്ട്രക്കായി പേസര്‍മാരായ എ.എ സംക്‌ലേച്ച നാലും എം.എം സയ്യദ് മൂന്നും വിക്കറ്റുകളും വീഴ്ത്തി.