കൊല്‍ക്കത്ത: ഐ.എസ്.എല്ലിലെ നിര്‍ണായക പോരാട്ടത്തില്‍ കേരള ബ്ലാസ്റ്റേഴ്‌സ് അത്‌ലറ്റിക്കോ ഡി കൊല്‍ക്കത്തയുമായി സമനിലയില്‍ പിരിഞ്ഞു. സി.കെ.വിനീതിലൂടെ എട്ടാം മിനുട്ടില്‍ നേടിയ ഗോളില്‍ ലഭിച്ച മുന്‍തൂക്കം കളഞ്ഞുകുളിച്ച കൊമ്പന്‍മാര്‍ക്ക് സ്വയം പഴിക്കാം. ഇതോടെ കൊച്ചിയിലെ നോര്‍ത്ത്ഈസ്റ്റിനെതിരായ അവസാന മത്സരം നിര്‍ണായകമായി. ഓരോ ഗോള്‍ വീതം നേടിയാണ് ബ്ലാസ്റ്റേഴ്‌സ് അത്‌ലറ്റിക്കോ പോരാട്ടം സമനിലയില്‍ അവസാനിച്ചത്. ബ്ലാസ്റ്റേഴ്‌സിനായി സി.കെ വിനീത് എട്ടാം മിനുട്ടിലും കൊല്‍ക്കത്തക്കായി പിയേഴ്‌സന്‍ 18ാം മിനുട്ടിലും ഗോള്‍ നേടി. സമനിലയില്‍ അവസാനിച്ചെങ്കിലും കൊല്‍ക്കത്ത സെമി ബര്‍ത്ത് ഏതാണ്ട് ഉറപ്പാക്കി.
തുടക്കം മുതല്‍ ആക്രമിച്ചു മുന്നേറി നയം വ്യക്തമാക്കിയ ബ്ലാസ്റ്റേഴ്‌സ് എട്ടാം മിനുട്ടില്‍ തന്നെ ലീഡെടുത്തു. കൊല്‍ക്കത്തയുടെ ഗോള്‍ കീപ്പര്‍ ദേബ്ജിത് മജുംദാറിന്റെ പിഴവില്‍ നിന്നായിരുന്നു വിനീതിന്റെ ഗോള്‍. ഗോളിയുടെ കൈയില്‍ നിന്നു വഴുതിയ പന്ത് ലഭിച്ചത് സെഡ്രിക്ക് ഹെങ്ബര്‍ട്ടിന്. ഹെങ്ബര്‍ട്ടിന്റെ ഷോട്ട് ഹെഡ്ഡറിലൂടെ വിനീത് വലയിലാക്കി.
ഐ.എസ്.എല്ലില്‍ മലയാളി താരം നേടുന്ന നാലാം ഗോളായിരുന്നു ഇത്. ഗോള്‍ വീണതോടെ ഉണര്‍ന്ന അത്‌ലറ്റിക്കോ പ്രത്യാക്രമണം കടുപ്പിച്ചു. ബ്ലാസ്റ്റേഴ്‌സ് പ്രതിരോധത്തെ നിരന്തരം പരീക്ഷിച്ച അവര്‍ പത്തു മിനുട്ടിനുള്ളില്‍ മറുപടിയും പറഞ്ഞു. കൊല്‍ക്കത്തന്‍ ആക്രമണങ്ങള്‍ക്ക് ചുക്കാന്‍ പിടിച്ച ഇയാന്‍ ഹ്യൂം- ഹെല്‍ഡര്‍ പോസ്റ്റിഗ- പിയേഴ്‌സന്‍ ത്രയത്തിന്റെ മുന്നേറ്റമാണ് ഗോളില്‍ കലാശിച്ചത്. അതിവേഗ നീക്കത്തിലൂടെ പന്തുമായി കുതിച്ച ഹ്യൂം പന്ത് മാര്‍ക്വീ താരം ഹെല്‍ഡര്‍ പോസ്റ്റിഗക്ക് കൈമാറുന്നു. പോസ്റ്റിഗയുടെ സുന്ദരമായൊരു ക്രോസില്‍ നിന്ന് പിയേഴ്‌സനാണ് വല ചലിപ്പിച്ചത്. മുന്‍ ബ്ലാസ്റ്റേഴ്‌സ് താരം കൂടിയായ പിയേഴ്‌സണ്‍ ഇടം കാലന്‍ ഷോട്ടിലൂടെ പന്ത് വലയിലേക്ക് തിരിച്ചുവിട്ടു. പ്രതിരോധിക്കാന്‍ തുനിഞ്ഞ സന്ദേശ് ജിങ്കാന്റെ ശ്രമം പരാജയപ്പെടുത്തിയാണ് പിയേഴ്‌സന്‍ സമനില ഗോള്‍ ടീമിനു സമ്മാനിച്ചത്. തുടര്‍ന്നും ഇരു ടീമുകളും ആക്രമണങ്ങള്‍ നടത്തിയെങ്കിലും ഇരു പക്ഷത്തേയും പ്രതിരോധ നിരകള്‍ പാറ പോലെ ഉറച്ചു നിന്നതോടെ മത്സരം ഒപ്പൊത്തിനൊപ്പം അവസാനിച്ചു. 13 മത്സരങ്ങളില്‍ നിന്ന് അഞ്ചു ജയവും നാലു പരാജയവും നാലു സമനിലയുമായി 19 പോയിന്റോടെ കേരളം നാലാമത്. ഇത്ര തന്നെ കളികളില്‍ നിന്നു അത്‌ലറ്റിക്കോ ഡി കൊല്‍ക്കത്തയ്ക്കും 19 പോയിന്റ്. എന്നാല്‍ ഗോള്‍ ശരാശരിയില്‍ അവര്‍ മുന്നില്‍. ബ്ലാസ്റ്റേഴ്‌സിന്റെ അവസാന മത്സരം ഡിസംബര്‍ നാലിനു കൊച്ചിയിലാണ്.
ഇന്നു നടക്കുന്ന നോര്‍ത്ത്ഈസ്റ്റ്- ഡല്‍ഹി ഡൈനാമോസ് മത്സരത്തില്‍ നോര്‍ത്ത്ഈസ്റ്റ് വിജയിച്ചാല്‍ കൊച്ചിയില്‍ നോര്‍ത്ത്ഈസ്റ്റിനെതിരായ മത്സരത്തില്‍ വിജയമോ സമനിലയോ ബ്ലാസ്റ്റേഴ്‌സിനു നിര്‍ബന്ധമാണ്. മറിച്ച് നോര്‍ത്ത്ഈസ്റ്റ് ഇന്നു പരാജയപ്പെട്ടാല്‍ കൊച്ചിയില്‍ വേവലാതികളില്ലാതെ ബ്ലാസ്റ്റേഴ്‌സിന് കളിക്കാനിറങ്ങാം. ഇന്ന് ഡല്‍ഹിയേയും അവസാന മത്സരത്തില്‍ ബ്ലാസ്റ്റേഴ്‌സിനേയും പരാജയപ്പെടുത്തിയാല്‍ നോര്‍ത്ത്ഈസ്റ്റിനു സെമി ഉറപ്പിക്കാം. അതോടെ കേരളത്തിന്റെ പ്രതീക്ഷകള്‍ അവസാനിക്കും.