കൃഷ്ണഗിരി(വയനാട്): ഒഡിഷയുടെ ബൗളര്‍മാര്‍ തീനാളങ്ങളായപ്പോള്‍ മഹാരാഷ്ട്ര എരിഞ്ഞമര്‍ന്നു. കൃഷ്ണഗിരിയില്‍ നടന്ന രഞ്ജി പോരാട്ടത്തില്‍ ഇന്നിങ്‌സിനും 118 റണ്‍സിനും ജയിച്ച് ഒഡിഷ ഗ്രൂപ്പില്‍ മൂന്നാം സ്ഥാനത്തേക്കു കുതിച്ചു. തലേന്നത്തെ സ്‌കോറിലേക്ക് എട്ടു റണ്‍സ് കൂട്ടിച്ചേര്‍ത്ത ഒഡിഷയുടെ ഒന്നാം ഇന്നിങ്‌സ് 319ല്‍ അവസാനിച്ചു. തുടര്‍ന്നു ബാറ്റിങ് ആരംഭിച്ച മഹാരാഷ്ട്രയെ പൊരുതാന്‍ പോലും അവസരം നല്‍കാതെ ഒഡിഷ ബൗളര്‍മാര്‍ എറിഞ്ഞിട്ടു. 94 റണ്‍സിനാണ് ആദ്യ ഇന്നിങ്‌സില്‍ മഹാരാഷ്ട്ര പുറത്തായത്. കേവലം 26 ഓവറുകളിലായിരുന്നു മഹാരാഷ്ട്രയുടെ പതനം. പേസര്‍മാരായ സൂര്യകാന്ത് പ്രധാന്‍ നാലും ബസന്ത് മൊഹന്തി, ദീപക് ബെഹ്‌റ എന്നിവര്‍ മൂന്നു വീതം വിക്കറ്റും വീഴ്ത്തിയാണ് മഹാരാഷ്ട്രയെ തകര്‍ത്തത്. എക്‌സ്ട്രാ ഇനത്തില്‍ ലഭിച്ച 19 റണ്‍സായിരുന്നു മഹാരാഷ്ട്രയുടെ ടോപ് സകോര്‍.
ഫോളോ ഓണ്‍ ഒഴിവാക്കാന്‍ വീണ്ടും ബാറ്റിങ്ങിനിറങ്ങിയ മഹാരാഷ്ട്രയെ നിര്‍ത്തിയിടത്തു നിന്നു തുടങ്ങിയ ആക്രമണത്തിലൂടെ ഒഡിഷ ബൗളര്‍മാര്‍ വീണ്ടും എറിഞ്ഞിട്ടു. 36.4 ഓവറില്‍ 107 റണ്‍സിനാണ് രണ്ടാമിന്നിങ്‌സില്‍ മഹാരാഷ്ട്ര പുറത്തായത്. ഒഡിഷക്കായി ബിപ്‌ലബ് സാമന്ത്രെ നാലും സൂര്യകാന്ത് പ്രധാന്‍ മൂന്നും ബസന്ത് മൊഹന്തി രണ്ടും ദീപക് ബെഹ്‌റ ഒരു വിക്കറ്റും വീഴ്ത്തി. വിജയത്തോടെ ഏഴു പോയിന്റുകള്‍ നേടി 22 പോയിന്റോടെ ഗ്രൂപ്പ് ബിയില്‍ അഞ്ചില്‍ നിന്നു മൂന്നിലേക്കാണ് ഒഡിഷ മുന്നേറിയത്.