തിരൂര്‍: മലേഷ്യയില്‍ നടന്ന ഇന്റര്‍നാഷണല്‍ മാസ്റ്റേഴ്‌സ് അത്‌ലറ്റിക് മീറ്റില്‍ കെ.പുരം സ്വദേശിനി റീന പാലക്കല്‍ നേടിയതു തിളക്കമാര്‍ന്ന ജയം. ഇന്ത്യയെ പ്രതിനിധികരിച്ചു റീന പങ്കെടുത്ത മൂന്നിനങ്ങളില്‍ 3000 മീറ്റര്‍ ഓട്ടത്തിലും നടത്തത്തിലും വെങ്കലം നേടി. കഴിഞ്ഞ വര്‍ഷം നടന്ന കേരള മാസ് റ്റേഴ്‌സ് അത്‌ലറ്റിക് മീറ്റില്‍ രണ്ടിനങ്ങളില്‍ സ്വര്‍ണം നേടി അതേവര്‍ഷം ലഖ്‌നൗവില്‍ നടന്ന ദേശിയ മീറ്റില്‍ രണ്ടു വെള്ളിയും നേടിയിരുന്നു. നിര്‍ധന കുടുംബാഗമായ റീന പ്രത്യേക പരിശീലനം നേടാതെയാണ് മീറ്റില്‍ പങ്കെടുത്തത്. ഭര്‍ത്താവ് മണിയുടെ സഹായത്തോടെ ദേവദാര്‍ സ്‌കൂള്‍ ഗ്രൗണ്ടിലും തിരൂര്‍ മുനിസിപ്പല്‍ സ്റ്റേഡിയത്തിലും സ്വന്തമായി നടത്തിയ പരിശീലനത്തിന്റെ ആത്മവിശ്വാസത്തിലായിരുന്നു സംസ്ഥാന, ദേശീയ, അന്തര്‍ദേശിയ മീറ്റുകളില്‍ പങ്കെടുത്തത്.
പുത്തന്‍തെരുവില്‍ തയ്യല്‍ കട നടത്തുന്ന റീന, താനാളൂര്‍ പഞ്ചായത്ത്, ബ്ലോക്ക് പഞ്ചായത്ത്, വി. അബ്ദുറഹ്മാന്‍ എം.എല്‍.എ, വി.ആര്‍ നായനാര്‍ സ്മാരക ഗ്രന്ഥാലയം എന്നിവയുടെ സഹായത്തോടെയാണ് മീറ്റുകളില്‍ പങ്കെടുത്തത്.