ന്യൂഡല്‍ഹി: ആഫ്രിക്കയിലെ കോങ്കോളീസ് പൗരനായ 23 കാരനെ ഡല്‍ഹിയില്‍ ഒരു സംഘം മര്‍ദിച്ചുകൊന്നു. സൗത്ത് ഡല്‍ഹിയിലെ വസന്ത് കുഞ്ച് മേഖലയിലാണ് സംഭവമെന്ന് പൊലിസ് അറിയിച്ചു.

എം.ടി ഒലിവ എന്നയാളാണ് കൊല്ലപ്പെട്ടത്. ഇന്നലെ രാത്രി 11.45 ഓടെ വീട്ടിലേക്കു മടങ്ങുന്നതിനിടയാണ് മര്‍ദനത്തിനിരയായത്. കിഷന്‍ഗഢിലെ ചിലരുമായി ഇയാള്‍ വാക്ക് തര്‍ക്കത്തിലേര്‍പ്പെട്ടിരുന്നുവെന്നും റിപ്പോര്‍ട്ടുണ്ട്.

മര്‍ദനമേറ്റ ഒലിവ ഓടി രക്ഷപ്പെടാന്‍ ശ്രമിച്ചെങ്കിലും ഓടിച്ചിട്ട് ഇഷ്ടിക കൊണ്ട് അടിച്ച് കൊലപ്പെടുത്തുകയായിരുന്നുവെന്ന് ദൃക്‌സാക്ഷികള്‍ പറഞ്ഞു.

സംഭവത്തില്‍ കേസ് രജിസ്റ്റര്‍ ചെയ്തിട്ടുണ്ടെന്നും അക്രമികളെ കണ്ടെത്താന്‍ സി.സി.ടി.വി ദൃശ്യങ്ങള്‍ പരിശോധിച്ചുവരികയാണെന്നും പൊലിസ് പറഞ്ഞു.