പൊന്നാനി: പൊന്നാനി സബ് ട്രഷറിയില്‍ ഇന്നലെ പണമെത്തിയത് ഉച്ചകഴിഞ്ഞ്. ശമ്പളവും പെന്‍ഷനും വാങ്ങാനെത്തിയവര്‍ ഇതുമൂലം മണിക്കൂറുകളോളം ദുരിതത്തിലായി.
പണമെത്താനുള്ള കാലതാമസം ട്രഷറിയിലെ ജീവനക്കാര്‍ക്കും മറ്റ് ഉദ്യോഗസ്ഥര്‍ക്കും ദുരിതം സൃഷ്ടിക്കുകയായിരുന്നു. പൊന്നാനി സബ്ട്രഷറിയില്‍ പണം വാങ്ങുവാനായി രാവിലെ തന്നെ നൂറുകണക്കിനാളുകള്‍ എത്തിയിരുന്നു. എന്നാല്‍ ട്രഷറിയില്‍ ആവശ്യത്തിനുള്ള പണം എത്തിയിരുന്നില്ല. പെന്‍ഷന്‍ വാങ്ങാനെത്തിയ വൃദ്ധരായ പലരും പരസ്പരം സങ്കടം പറഞ്ഞും ക്ഷോഭിച്ചും വിമര്‍ശിച്ചും തങ്ങളുടെ രോഷം പ്രകടിപ്പിച്ചു. ഇതിനിടെ ട്രഷറിയിലെ ബുദ്ധിമുട്ടില്‍ പ്രതിഷേധിച്ച് എന്‍.ജി.ഒ യൂനിയന്റെ നേതൃത്വത്തില്‍ ട്രഷറിക്ക് മുന്നില്‍ പ്രതിഷേധ റാലികള്‍ നടന്നു. മാര്‍ച്ച് പോലിസ് തടയുകയായിരുന്നു. ട്രഷറി പ്രവര്‍ക്കിക്കുന്നത് കോടതി കെട്ടിടത്തിലായതിനാല്‍ മാര്‍ച്ച് അനുവദിക്കില്ലെന്ന് പൊന്നാനി മജിസ്‌ട്രേറ്റ് പറഞ്ഞു. എന്നാല്‍ ഇതിനു മുന്‍പും ഇവിടെ പ്രതിഷേധങ്ങള്‍ നടന്നിട്ടുണ്ടെന്നാണ് എന്‍.ജി.ഒ നേതാക്കളുടെ വിശദീകരണം. വ്യാഴാഴ്ചയും പൊന്നാനി സബ്ട്രഷറിയില്‍ പണം നല്‍കാന്‍ കഴിഞ്ഞിരുന്നില്ല . ഇന്നലെ ഉച്ചക്ക് ശേഷം പണം ലഭിച്ചപ്പോഴാകട്ടെ അത് തികഞ്ഞുമില്ല. പെന്‍ഷന്‍ വാങ്ങാനെത്തിയവരാണ് ഇതുമൂലം ഏറെ ദുരിതത്തിലായത്.