കൊല്ലം: മയക്കുമരുന്ന് ഉപയോഗത്തിനെതിരായ സന്ദേശവുമായി കൊല്ലം സിറ്റി പൊലിസും ടി.കെ.എം ഇന്‍സ്റ്റിറ്റ്യൂട്ട് ഓഫ് മാനേജ്‌മെന്റും സംയുക്തമായി നഗരത്തില്‍ വാക്കത്തോണ്‍ സംഘടിപ്പിച്ചു.
കെ.എസ്.ആര്‍.ടി ബസ് സ്റ്റാന്‍ഡ് പരിസരത്ത് സിറ്റി പൊലിസ് കമ്മിഷണര്‍ സതീഷ് ബിനോ ഫ്‌ളാഗ്ഓഫ് ചെയ്തു. ടി.കെ.എം ഇന്‍സ്റ്റിറ്റ്യൂട്ടിലെയും നഗരത്തിലെ വിവിധ സ്‌കൂളുകളിലെയും വിദ്യാര്‍ഥികള്‍, സ്റ്റ്യുഡന്റ് പൊലിസ് കേഡറ്റുകള്‍, ഗൈഡ്‌സ്, റോളര്‍ സ്‌കേറ്റിങ് താരങ്ങള്‍ തുടങ്ങിയവര്‍ അണിനിരന്ന വാക്കത്തോണ്‍ ചിന്നക്കടയില്‍ സമാപിച്ചു.
തുടര്‍ന്ന് മയക്കുമരുന്നിനെതിരായ നൃത്താവിഷ്‌കാരം നടന്നു. സമാപനച്ചടങ്ങില്‍ എം. നൗഷാദ് എം.എല്‍.എ, മേയര്‍ വി. രാജേന്ദ്ര ബാബു തുടങ്ങിയവര്‍ പങ്കെടുത്തു. ചെന്നൈ അപ്പോളോ ആശുപത്രി, ലയണ്‍സ് ക്ലബ് എന്നിവയുടെ സഹകരണത്തോടെ സംഘടിപ്പിച്ച വാക്കത്തോണിന് പൊലിസ് അസിസ്റ്റന്റ് കമ്മിഷണര്‍മാരായ റെക്‌സ് ബോബി അര്‍വിന്‍, ജോര്‍ജ് കോശി, അബ്ദുല്‍ റഷീദ്, മെഡിട്രീന ആശുപത്രി ഡയറക്ടര്‍ ഡോ. എ വിശ്വനാഥന്‍, ഡോ. രാമഭദ്രന്‍, ടി.കെ.എം ഇന്‍സ്റ്റിറ്റ്യൂട്ട് എക്‌സിക്യൂട്ടീവ് ഡയറക്ടര്‍ അബ്ദുല്‍ കരീം മുസ്‌ലിയാര്‍ തുടങ്ങിയവര്‍ നേതൃത്വം നല്‍കി.