മലപ്പുറം: സംസ്ഥാന സ്‌കൂള്‍ കായികോല്‍സവത്തില്‍ ആദ്യ സ്വര്‍ണം എറണാകുളം ജില്ലയ്ക്ക്. സീനിയര്‍ ആണ്‍കുട്ടികളുടെ 5000 മീറ്ററിലാണ് എറണാകുളം ജില്ലയ്ക്ക് സ്വര്‍ണം. കോതമംഗലം മാര്‍ബേസില്‍ സ്‌കൂളിലെ ബിബിന്‍ ജോര്‍ജാണ് സ്വര്‍ണം നേടിയത്. നിലവിലെ ചാംപ്യന്മാര്‍ കൂടിയായ എറണാകുളത്തിന് ഇതു വരെ രണ്ടു സ്വര്‍ണം ലഭിച്ചു. രണ്ടാം സ്വര്‍ണം ജൂനിയര്‍ ആണ്‍കുട്ടികളുടെ 3000 മീറ്ററിലാണ്. മാര്‍ബേസിലെ തന്നെ ആദര്‍ശ് ബേബിയാണ് നേടിയത്.

സീനിയര്‍ പെണ്‍കുട്ടികളുടെ 3000 മീറ്ററില്‍ പാലക്കാടിന്റെ സി.ബബിത സ്വര്‍ണം നേടി. ദേശീയ റെക്കോര്‍ഡോടെയാണ് ബബിതയുടെ നേട്ടം.

കാലിക്കറ്റ് സര്‍വകലാശാശ സി.എച്ച് മുഹമ്മദ് കോയ സ്‌റ്റേഡിയത്തിലെ സിന്തറ്റിക്ക് ട്രാക്കിലാണ് മല്‍സരങ്ങള്‍ നടക്കുന്നത്. രണ്ടു സ്വര്‍ണം വീതം കരസ്ഥമാക്കി എറണാകുളത്തിനൊപ്പം പാലക്കാടും മല്‍സരത്തില്‍ ഒപ്പത്തിനൊപ്പമാണ്.