തിരുവനന്തപുരം: സംസ്ഥാനത്തെ അര്‍ബന്‍ ബാങ്കുകള്‍ പ്രാഥമിക സഹകരണ സംഘങ്ങള്‍ക്ക് അക്കൗണ്ട് തുറക്കാന്‍ സൗകര്യമൊരുക്കണമെന്നു സഹകരണവകുപ്പു മന്ത്രി കടകംപള്ളി സുരേന്ദ്രന്‍ ആവശ്യപ്പെട്ടു. അതുവഴി പ്രാഥമികസംഘങ്ങള്‍ക്കു കൂടുതല്‍ പണലഭ്യത ഉറപ്പാക്കാനാവുമെന്ന് അദ്ദേഹം പറഞ്ഞു.
സഹകരണമേഖലയിലെ പ്രശ്‌നങ്ങള്‍ ചര്‍ച്ച ചെയ്യാന്‍ സഹകരണ അര്‍ബന്‍ ബാങ്ക് പ്രസിഡന്റുമാരുടേയും പി.എ.സി.എസ് അസോസിയേഷന്റെയും ജോയിന്റ് രജിസ്ട്രാര്‍മാരുടേയും യോഗം ഉദ്ഘാടനം ചെയ്തു സംസാരിക്കുകയായിരുന്നു മന്ത്രി. സംസ്ഥാന സഹകരണ ബാങ്കിനും അര്‍ബന്‍ ബാങ്കുകള്‍ക്കുമാണു പ്രവര്‍ത്തന സ്വാതന്ത്ര്യമുള്ളത്. പ്രതിസന്ധിഘട്ടത്തില്‍ സഹകരണസംഘങ്ങളെ സഹായിക്കാന്‍ അര്‍ബന്‍ ബാങ്കുകള്‍ തയാറാകണം. പ്രശ്‌നങ്ങള്‍ സഹകരണമേഖല ഒറ്റക്കെട്ടായി നേരിടണം. ഡിസംബര്‍ 10 മുതല്‍ ജനുവരി 10 വരെ സഹകരണ സംരക്ഷണ കാമ്പയിന്‍ ആചരിക്കും. ഇതിന്റെ സംസ്ഥാനതല കണ്‍വെന്‍ഷന്‍ 11ന് എറണാകുളത്ത് നടത്തുമെന്നും മന്ത്രി പറഞ്ഞു.
യോഗത്തില്‍ വി. ജോയ് എം.എല്‍.എ, സഹകരണ സംഘം രജിസ്ട്രാര്‍, അര്‍ബന്‍ ബാങ്ക് പ്രസിഡന്റുമാര്‍, പി.എ.സി.എസ് അസോസിയേഷന്‍ ഭാരവാഹികള്‍, ജോയിന്റ് രജിസ്ട്രാര്‍മാര്‍ പങ്കെടുത്തു.