ദമ്മാം: സഊദി അറേബ്യയില്‍ വിദേശികളെയും സ്വദേശികളെയും തരം തിരിച്ചുള്ള ജസംഖ്യാ വിവരങ്ങള്‍ പുറത്തുവന്നു. സഊദി ജനറല്‍ അതോറിറ്റി ഫോര്‍ സ്റ്റാറ്റിറ്റിക്‌സ് (ഗാ സ്റ്റാറ്റ്) ആണ് പുതിയ കണക്കുകള്‍ പുറത്ത് വിട്ടത്. ഇത് പ്രകാരം രാജ്യത്തെ മൊത്തം ജനസംഖ്യയുടെ 32.72 ശതമാനമാണ് വിദേശികളുടെ സ്ഥാനം.
രാജ്യത്തെ വിദേശികളും സ്വദേശികളുമടങ്ങുന മൊത്തം ജനസംഖ്യ 30.77 മില്യണ്‍ ആണ്. ഇതില്‍ 10.7 മില്യണ്‍ വിദേശികളാണ്. അതായത് ആകെ ജനസംഖ്യയുടെ 32.72 ശതമാനമെന്ന് സ്റ്റാറ്റിസ്റ്റിക്‌സ് കണക്കുകള്‍ വ്യക്തമാക്കുന്നു. ജിസിസി അംഗരാജ്യങ്ങളിലെ ഏറ്റവും താഴ്ന്ന നിരക്കാണിത്.
സഊദി അറേബ്യ, ഖത്തര്‍, യു എ ഇ, ബഹ്‌റിന്‍, ഒമാന്‍, കവൈത്ത് എന്നീ രാജ്യങ്ങളങ്ങുന്ന ജിസിസി രാജ്യങ്ങളിലെ ജനസംഖ്യയില്‍ ഏറ്റവും കുതല്‍ വിദേശികള്‍ ഉള്‍കൊള്ളുന്നത് യു എ ഇയാണ്. ആകെ ജനസംഖ്യയുടെ 87 ശതമാനമാണ് വിദേശികള്‍ ഇവിടെ. ഖത്തറില്‍ 86 ശതമാനവും കുവൈത്തില്‍ 70 ശതമാനവുമാണ് വിദേശികള്‍. ജിസിസി രാജ്യങ്ങളിലെ തൊഴിലാളികളില്‍ ഭൂരിഭാഗവും അവിദഗ്ധരായ തൊഴിലാളികളാണെന്ന് അല്‍ റിയാദ് പത്രം റിപ്പോര്‍ട്ട് ചെയ്തു.
സഊദിയില്‍ ഏറ്റവും കൂടുതല്‍ ജനസംഖ്യയുള്ളത് മക്കയിലാണ് .സ്വദേശികളും വിദേശികളുമടക്കം 7,897,975 താമസക്കാരാണ് ഇവിടെയുള്ളത്. രണ്ടാം സ്ഥാനം തലസ്ഥാന നഗരിയായ റിയാദിലാണ്.7,717,467 പേര്‍. 4,650,183 പേരുള്ള കിഴക്കന്‍ പ്രവിശ്യയാണ് മൂന്നാം സ്ഥാനത്ത്.