തലശ്ശേരി: വീട്ടില്‍ കയറി ഒരു സംഘം മര്‍ദിച്ചതിനെ തുടര്‍ന്ന് ഗൃഹനാഥനെയും ഭാര്യയെയും മകളെയും ആശുപത്രിയില്‍ പ്രവേശിപ്പിച്ചു. കൊടുവള്ളി ആമുക്ക പള്ളിക്കു സമീപം പ്രിയദര്‍ശിനിയില്‍ സുരേഷ്(55), സൗദാമിനി(45), മകള്‍ ലക്ഷ്മി(16) എന്നിവരെയാണ് പരിക്കേറ്റതിനെത്തുടര്‍ന്ന് തലശ്ശേരി ജനറലാശുപത്രിയില്‍ പ്രവേശിപ്പിച്ചത്. ഇന്നലെ ഉച്ചയോടെയാണ് സംഭവം. ദേശീയപാതക്കു സമീപം പുറമ്പോക്കില്‍ കുടിലില്‍ കഴിയുന്ന ഇവരുടെ വീടിനു സമീപത്തെ വര്‍ക്ക്‌ഷോപ്പ് ഉടമയും മറ്റും നിരന്തരമായി ദ്രോഹിക്കാറുണ്ടെന്ന് സുരേഷ് പരാതിപ്പെട്ടിരുന്നു. ഇതു സംബന്ധിച്ച് മനുഷ്യാവകാശ കമ്മിഷനും മുഖ്യമന്ത്രിക്കും പരാതി നല്‍കി. തുടര്‍ന്ന് ഇന്നലെ ആണ്ടി, സുധി തുടങ്ങിയവരുടെ നേതൃത്വത്തിലുള്ള സംഘം വീട്ടില്‍ ഇരച്ചുകയറി വീട്ടു സാധനങ്ങള്‍ പുറത്തേക്കു വലിച്ചെറിയുകയും സുരേഷിനെയും കുടുംബത്തെയും മര്‍ദിക്കുകയും ചെയ്‌തെന്നായിരുന്നു പൊലിസില്‍ നല്‍കിയ പരാതിയില്‍ പറയുന്നത്. ധര്‍മടം പൊലിസ് കേസെടുത്ത് അന്വേഷിച്ച് വരികയാണ്. സുരേഷിന്റെ കുടുംബത്തിന് തലശ്ശേരി നഗരസഭയിലെ മുന്‍ കൗണ്‍സിലര്‍ പ്രശാന്തിന്റെ നേതൃത്വത്തിലാണ് നാട്ടുകാരുടെ സഹായത്തോടെ ഇവിടെ വീടുവച്ചു നല്‍കിയത്.