കൂത്താട്ടുകുളം: കിഴകൊമ്പ് ചമ്പമലയില്‍ നിന്നും ക്രീംകളറുള്ള മാരുതി ഒമ്‌നി വാനില്‍ ഒരു കുട്ടിയെ ചിലര്‍ ചേര്‍ന്ന് തട്ടിക്കൊണ്ടുപോയതായും, വാനില്‍ നിന്നും കുട്ടിയുടെ കരച്ചില്‍ കേട്ടു എന്ന വ്യാജവാര്‍ത്ത നാട്ടുകാരുടേയും, പൊലിസിന്റെയുമിടയില്‍ പരിഭ്രാന്തി പരത്തി.
ചമ്പമലയിലുള്ള ഒരു സ്ത്രീയില്‍ നിന്നും കൂത്താട്ടുകുളം പൊലിസിനു ലഭിച്ച ഫോണ്‍ സന്ദേശത്തെത്തുടര്‍ന്ന് എല്ലാ സ്റ്റേഷനുകളിലേയ്ക്കും മെസേജ് അയച്ചു. വാഹനങ്ങള്‍ തടഞ്ഞുനിര്‍ത്തി പരിശോധന നടത്തുകയും ചെയ്തു. കുട്ടിയെ കണ്ടെത്താന്‍ കഴിഞ്ഞില്ല. പൊലീസിനു വിവരം കൊടുത്ത സ്ത്രീയെ തിരികെ വിളിച്ചപ്പോള്‍ മൊബൈല്‍ ഫോണ്‍ ഓഫാക്കിയ നിലയിലായിരുന്നു. അവര്‍ നല്‍കിയ വണ്ടി നമ്പര്‍ ഒരു ബൈക്കിന്റെതാണെന്ന് പിന്നീട് തിരിച്ചറിഞ്ഞു. പൊലിസ് സൈബര്‍ സെല്ലിന്റെ സഹായത്തോടെ സ്ത്രീയെ കണ്ടെത്തി. ചമ്പമലയില്‍ത്തന്നെ താമസിക്കുന്ന മാനസിക ദൗര്‍ബല്യമുള്ള ആളാണെന്ന് ബോധ്യപ്പെട്ടതിനാല്‍ നടപടികള്‍ സ്വീകരിക്കാതെ വിട്ടയച്ചു.