കോവളം: അമിത വേഗതയിലെത്തിയ കാറിടിച്ച് ഒടിഞ്ഞ വൈദ്യുത പോസ്റ്റ് എതിരെ വന്ന ബൈക്കിനു മേല്‍ വീണു.
ബൈക്ക് യാത്രികന് ഗുരുതര പരുക്ക്. ബുധനാഴ്ച വൈകിട്ട് വിഴിഞ്ഞം ജങ്ഷന് സമീപത്തായിരുന്നു അപകടം. പൂവാര്‍ പഴയ കട സ്വദേശി സനലി (40) നാണ് പരുക്കേറ്റത്. ഇയാളെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
വിഴിഞ്ഞം ജങ്ഷനില്‍ നിന്നും തിരുവനന്തപുരത്തേക്കു അമിത വേഗതയിലെത്തിയ കാര്‍ നിയന്ത്രണം വിട്ടു പോസ്റ്റില്‍ ഇടിക്കുകയും അതിന്റെ ആഘാതത്തില്‍ പോസ്റ്റ് ഒടിഞ്ഞ് എതിരെ വരികയായിരുന്ന ബൈക്കിനു മുകളില്‍ വീഴുകയായിരുന്നുവെന്നും വിഴിഞ്ഞം പൊലിസ് പറഞ്ഞു.
കാറോടിച്ചിരുന്ന നന്തന്‍കോട് സ്വദേശി സിസിലി(45)നെ പൊലിസ് കസ്റ്റഡിയിലെടുത്തു. അപകടത്തെ തുടര്‍ന്ന് ഏറെ നേരം ഇതുവഴിയുള്ള വാഹന ഗതാഗതം തടസ്സപ്പെട്ടു. കാര്‍ ഓടിച്ചിരുന്ന സിസിലിനെ വൈദ്യപരിശോധനയ്ക്ക് ഹാജരാക്കുമെന്ന് വിഴിഞ്ഞം എസ്.ഐ.പി.രതീഷ് അറിയിച്ചു.