ചെന്നൈ: തുഗ്ലക്ക് എന്ന മാസികയിലുടെ ശ്രദ്ധേയനായ ചോ രാമസ്വാമി രാഷ്ട്രീയ ആക്ഷേപ ഹാസ്യങ്ങള്‍ക്ക് പുതിയ മാനം നല്‍കിയ വ്യക്തിയായിരുന്നു. തമിഴ് സാഹിത്യ ലോകത്തിന് അദ്ദേഹം നല്‍കിയ സംഭാവന വളരെ വലുതായിരുന്നു. സാഹിത്യകാരനും രാഷ്ട്രീയ നിരീക്ഷകനും പത്രപ്രവര്‍ത്തകനും എന്നീ നിലകളില്‍ നിറഞ്ഞു നിന്ന അദ്ദേഹത്തിന്റെ വിയോഗം തമിഴ് സാഹിത്യ ലോകത്തിനും നാടക ലോകത്തിനും രാഷ്ട്രീയ രംഗത്തിനും കനത്ത നഷ്ടമാണ്.  
വിമര്‍ശനങ്ങളുണ്ടെങ്കിലും അദ്ദേഹം എല്ലാ നേതാക്കളുമായും അടുത്ത ബന്ധം പുലര്‍ത്തി. തമിഴ് രാഷ്ട്രീയത്തിലെ പ്രമുഖ വ്യക്തികളായിരുന്ന കാമരാജ് മുതല്‍ കരുണാനിധി, ജയലളിത എന്നിവര്‍ക്കുപുറമെ ദേശീയ രാഷ്ട്രീയത്തിലെ പ്രമുഖ വ്യക്തികള്‍ വരെ അദ്ദേഹത്തിന്റെ എഴുത്തിന്റെ ശക്തിയുടെ നോവറിഞ്ഞവരാണ്. മോദിയെ മരണത്തിന്റെ വ്യാപാരിയെന്ന് വിശേഷിപ്പിച്ചാണ് രാമസ്വാമി വിമര്‍ശിച്ചിരുന്നത്.  
2007ലെ ഗുജറാത്ത് അസംബ്ലി തെരഞ്ഞെടുപ്പിനോടനുബന്ധിച്ചാണ് അദ്ദേഹം ഇത്തരമൊരു വിമര്‍ശനം ഉന്നയിച്ചത്. 2002ലെ ഗുജറാത്ത് കലാപത്തിന്റെ  പശ്ചാത്തലത്തിലായിരുന്നു ഇത്തരമൊരു പ്രയോഗം നടത്തിയത്.
അദ്ദേഹത്തെ കഴിഞ്ഞ ദിവസം പ്രധാനമന്ത്രി മോദി ആശുപത്രിയില്‍ സന്ദര്‍ശിച്ചിരുന്നു. തനിക്കെതിരേ കടുത്ത വിമര്‍ശനം നടത്തിയെങ്കിലും അദ്ദേഹത്തിന്റെ മരണത്തോടെ നല്ലൊരു സുഹൃത്തിനെയാണ് നഷ്ടമായതെന്ന് മോദി ട്വീറ്റ് ചെയ്തു.  
1934 ഒക്ടോബര്‍ അഞ്ചിന് വക്കീല്‍ കുടുംബത്തിലായിരുന്നു ചോ രാമസ്വാമിയെന്ന ശ്രീനിവാസ അയ്യര്‍ രാമസ്വാമിയുടെ ജനം. പിതാവുള്‍പ്പടെ കുടുംബത്തിലുളളവരില്‍ പലരും അഭിഷാകരായിരുന്നു. ചോ രാമസ്വാമിയും ആ വഴിയിലേക്കിറങ്ങി.
കുറച്ചുകാലം പലയിടങ്ങളിലും പ്രാക്ടീസ് ചെയ്ത ശേഷം നാടക രംഗത്തേക്ക് തന്റെ പ്രവര്‍ത്തനം മാറ്റി.
രാഷ്ട്രീയ-സാമൂഹിക വിമര്‍ശനങ്ങളായിരുന്നു നാടകലോകത്ത് അദ്ദേഹത്തെ വേറിട്ടു നിര്‍ത്തിയത്.  1960ല്‍ എം. ഭക്തവല്‍സലത്തിന്റെ നേതൃത്വത്തിലുള്ള കോണ്‍ഗ്രസ് സര്‍ക്കാര്‍ ചോ രാമസ്വാമിയുടെ നാടകമായ സംഭവാമി യുഗേ യുഗേയുടെ തിരക്കഥ സെന്‍സര്‍ ചെയ്യാന്‍ നീക്കം നടത്തിയത് വിവാദമായി.
തുടര്‍ന്ന് രാഷ്ട്രീയ ആക്ഷേപ ഹാസ്യ നാടകമായ മുഹമ്മദ് ബിന്‍ തുഗ്ലക് വിജയിച്ചതോടെ അദ്ദേഹം പതുക്കെ സിനിമയിലേക്ക് ചുവടുമാറ്റി.
ഇവിടെ നിന്നാണ് സ്വന്തമായി ഒരു മാഗസിന്‍ തുടങ്ങിയത്. മികച്ച  പത്രപ്രവര്‍ത്തകനുള്ള  ബി.ഡി ഗോയങ്ക പുരസ്‌കാരവും നേടി. രാജ്യസഭയിലേക്ക് എംപിയായും ചോ രാമസ്വാമിയെത്തി. എ.ബി വാജ്‌പേയി പ്രധാനമന്ത്രിയായിരുന്നപ്പോഴാണ് രാജ്യസഭയിലേക്ക് അദ്ദേഹത്തെ നാമനിര്‍ദ്ദേശം ചെയ്തത്.